Petropavlda volonterler analar úıi turǵyndaryn merekemen quttyqtady
Petropavldaǵy analar úıiniń jumys istep jatqanyna bıyl 11 jyl. Osy aralyqta bul mekeme júzdegen áıel men balaǵa pana boldy. Qazir munda 5 ana men 7 bala turyp jatyr. Solardyń biri — Elena. Oǵan kómek qolyn sozar áke-sheshesi joq, jetim. Analar úıinde turyp jatqanyna 3 aıdan asqan.
— Qatty qınalǵasyn kelgen edim, qarsy aldy, úmit syılady. Meni de, balamdy da bastan-aıaq kıindirdi. Іshetin tamaǵymyz bar, jyly jerde jatyrmyz. Bul jerde jaqsy psıholog bar, ol da kómektesti. Analar úıinen shyqqasyn balamdy balabaqshaǵa berip, ózim burynǵy jumysyma turamyn, — deıdi Elena.
Elena jetim retinde páter kezeginde tur.
Jastar resýrstyq ortalyǵynyń volonterleri de olardy nazardan tys qaldyrmaıdy. Bul joly Jańa jyl merekesine oraı analar men balalarǵa syılyq jáne merekelik dastarhanǵa túrli tátti ákeldi.
— Biz bul mekemeni qamqorlyǵymyzǵa alǵanbyz. Úsh jyl boldy, únemi kelip, qajet zattaryn ákep tastaımyz. Ádette habarlasyp, ne qajet ekenin aıtady. Mysaly, balalarǵa arnalǵan kıimder, gıgıenalyq zattar nemese azyq-túlik kerek bolyp jatady. Al búgin biz jańa jyl merekesi qarsańynda arnaıy quttyqtap keldik. Bizdi munda únemi jyly qabaqpen qarsy alyp, shaı ishkizbeı jibermeıdi. Áńgimelesemiz, balalardy oınatamyz, — deıdi volonter Aısulý Bekimova.
Analar úıin qıyn jaǵdaıǵa tap bolǵan kelinshekter jarty jyl ǵana panalaı alady.
Buǵan deıin SQO-da eki balanyń astan ýlanyp qaıtys bolýyna kináliler áli jazalanbaǵanyn jazǵan edik.