Petropavlda varıkozdy emdeýdiń jańasha tásili qoldanysqa engizildi

PETROPAVL. QazAqparat – Soltústik Qazaqstan oblysy kópsalaly aýrýhanasynyń kardıologııa ortalyǵy bıyldan bastap varıkozdy emdeýde az ınvazıvti, sáýlelik operatsııalar jasaı bastady, dep habarlaıdy QazAqparat tilshisi.

SQO kardıologııalyq ortalyq baspasóz qyzmetiniń málimetinshe, bıyl óńir kardıologteri 367 syrqatqa varıkozǵa qarsy ota jasaǵan. Sonyń 244-i zamanaýı tásilmen júzege asyrylǵan, ıaǵnı kóktamyry keńeıgen bul syrqattarǵa endovazaldy sáýlelik oblıteratsııa otasy jasalǵan.

«Bul zamanaýı otanyń basty artyqshylyǵy – az ınvazıvtigi. Operatsııa tiliksiz, jergilikti anestezııa arqyly jasalady. Patsıent tańerteń kelse, keshke óz aıaǵymen úıine qaıtady. Buryn julynǵa anestezııa qoıylatyn. Odan keıin naýqas 3-4 saǵat qozǵala almaı qalatyn. Aıaǵyn tilip, kóktamyryn alyp tastaıtyn edi. Odan keıin uzaq ýaqyt boıy ońaltý júrgiziletin», - deıdi kardıologııalyq ortalyqtyń angıohırýrgy Rýstam Tashtanov.

Mamannyń aıtýynsha, ota kóp bolsa bir saǵatqa sozylady. Operatsııadan keıin qosymsha em-domnyń qajeti joq. Tek belgili bir ýaqytqa kompressııaly shulyq kııý kerek bolady.

«Otanyń bul túrine qarsy kórsetilimder bar. Ol – trombofılııa, aıaqtyń sozylmaly ıshemııasy, kompressııaǵa qarsy kórsetilim, júktilik, artyq salmaq. Kardıologııalyq ortalyqta operatsııa tegin jasalady», - deıdi Rýstam Tashtanov.

Dárigerdiń aıtýynsha, varıkoz aýrýymen erler de, áıelder de aýyrady. Kóbine kóp balaly analar, egde jastaǵylar syrqattanady. Varıkozdyń paıda bolýynyń birneshe sebebi bar: artyq salmaq, otyryp jumys isteý, bıiktigi 4 sm asatyn óksheli aıaq kıimmen uzaq ýaqyt júrý, júktilik jáne kúndelikti shıki kókónis pen jemisti az tutyný.

«Eger de aıaqta aýyrlyq sezimi paıda bolyp, tez sharshaıtyn bolsa, aýyrsa, isinse, kóktamyr teriniń syrtynan kórinetin bolsa ýaqytty sozbaı dárigerge kórinip, em alǵan jón. Qalypty jaǵdaıda qan kóktamyr arqyly júrek pen ókpege qaraı jylystaıdy. Adam aǵzasyndaǵy qannyń tómen emes, joǵary qaraı qozǵalýyn retteıtin kóktamyrda qaqpaqshalar bar. Olar ashylyp, qannyń keri ketpeýi úshin qaıta jabylyp otyrady. Qaqpaqshalar durys jabylmasa, qan tómen qaraı aǵady da, kóktamyrda qan syımaı ketedi. Sondyqtan, qan tamyrlary keńeıip, teri astynan kórine bastaıdy. Bul estetıka jaǵynan ǵana emes, adam ómirine qaýipti», - deıdi maman.