Petropavlda úsh kópqabatty úıdi gazsyz qaldyrǵan kólik júrgizýshisi jazalandy

<p>Petropavlda kóligimen gaz qubyryn ilip áketip, saldarynan birneshe kún kópqabatty úsh úıdi gazsyz qaldyrǵan kólik júrgizýshisine qatysty sot sheshim shyǵardy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Esterińizge salaıyq, 5 qarasha kúni saǵat 9.30 shamasynda plastıkalyq terezelerdi montajdaýmen aınalysatyn uıymǵa tıesili «Gazel» avtokóliginiń júrgizýshisi Petropavldaǵy N.Nazarbaev kóshesi, 292 mekenjaıyndaǵy úıdiń gaz qubyryn syryp ótken. Apattyq jaǵdaıǵa baılanysty osy kóshedegi 290, 292, 294 mekenjaıyndaǵy úsh úı birneshe kún boıy gazsyz otyrdy. Sondaı-aq qulaǵan qubyr sol jerde turǵan kólikti zaqymdaǵan. Osylaısha «Gorgaz-servıs» JShS-ge jáne jeke tulǵaǵa materıaldyq shyǵyn keltirildi. 

Petropavl qalasynyń ákimshilik quqyq buzýshylyqtar boıynsha mamandandyrylǵan soty osy faktige qatysty isti qarady. Jolda júrý qaǵıdasyn buzǵan júk kóliginiń júrgizýshisi kinásin moıyndady. Er adam keltirgen shyǵyndy tolyǵymen ótep, turǵyndarǵa suıytylǵan gaz berý jumysy qalpyna keltirildi.

Sondaı-aq jolda júrý erejesin buzǵany úshin ákimshilik jazaǵa tartyldy, oǵan 69 myń teńge mólsherinde aıyppul salyndy.