Petropavlda ýly gaz datchıgi kópbalaly otbasyn qutqaryp qaldy

PETROPAVL. QazAqparat – Petropavlda qutqarýshylar ornatyp ketken ýly gazdy anyqtaıtyn datchık bir úıli jandy ólim aýzynan qutqardy, dep habarlaıdy QazAqparat tilshisi.

SQO Tótenshe jaǵdaılar departamentiniń baspasóz qyzmeti usynǵan aqparatqa sáıkes, Petropavl qalasynyń turǵyny Ásel Tokına ádettegideı uıyqtar aldynda pesh jaqqan. Keıin janyp jatqan kómirdiń ústine qoqys jınalǵan polıetılen paketin tastaǵan. Al onda plastmass oıynshyqtardyń synǵan bólshekteri bolǵan. Tórt balasyn jatqyzyp, teledıdar kórýge otyrǵan ol, qalǵyp ketken.

Kelinshek qatty dybystan oıanǵan. Datchık iske qosylǵan eken. Qoıý aşy tútin kireberisten úıge ene bastaǵan. Janǵan plastık pesh ottyǵynan aǵyp, tútindep ótkir ıis bólgen.

«Bizge órtke qarsy dabyl ornatylmaǵanda aman qalýymyz neǵaıbyl edi. Kók tútindi kórip, birden esik-terezeni ashtym. Kúıeýim jumysta bolatyn. Qazir ony oılaýdyń ózi qorqynyshty. Sizderdiń qyzmetkerlerińizge úlken rahmet. Sizder bizdiń otbasymyzdy aman saqtap qaldyńyzdar», - dep Ásel Tokına departament basshysynyń atyna alǵys hat joldady.

Mamandardyń aıtýynsha, óńirde kópbalaly otbasylardyń úılerine tútin jáne ýly gazdy sezetin 400-den astam qurylǵy ornatyldy. Bul jumystar aldaǵy ýaqytta jalǵasyn tappaq.