Petropavlda UBT ortasha kórsetkishi - 81 ball
Petropavlda UBT M.Qozybaev atyndaǵy SQMÝ negizinde maýsymnyń 24, 26 jáne 29 kúnderi ótti. 24-i men 26-sy bıylǵy mektep túlekteri tapsyrsa, maýsymnyń 29-y kúni kásiptik-tehnıkalyq oqý oryndarynyń túlekteri jáne byltyrǵy mektep túlekteri óz bilimin synaýǵa múmkindik aldy. Jalpy, shahar boıynsha testileýge qatysýǵa 1306 adam ótinish bildirse, onyń 1181 ǵana qatysqan. 125 túlek sebepsiz UBT-ǵa kelmegen.
«SQO boıynsha eń joǵary shekti ball - 134. Bul respýblıka boıynsha da eń joǵary kórsetkishterdiń biri sanalady. Eń tómengi kórsetkish - 21 ball. Bul jerde biz shyǵarmashylyq emtıhan tapsyratyn stýdentterdi eseptemesek bolady. Olar eki pánnen ǵana test tapsyrady, maksımaldy ball - 40 upaı», - deıdi M.Qozybaev atyndaǵy SQMÝ qabyldaý komıssııasy jaýapty hatshysynyń orynbasary Almas Kenjeǵalın.
Petropavlda UBT kezinde zań buzý faktileri oryn alǵan joq. Testileýdiń aldynda 381 bala óz erkimen uıaly telefonyn tapsyrǵan. Jalpy, myńnan astam bala shekti upaıdy jınady. Endi olar 13-20 shilde aralyǵynda bilim grantyna iligý úshin qujat tapsyra alady. Bıyl memleket tarapynan 50 myń grant bólinip otyr.
«Ótken jylmen salystyrǵanda UBT tapsyrýshylardyń jınaǵan baly 5-6 upaıǵa joǵary bolyp otyr. Bıyl testileý jańa formatta júrgizildi, ıaǵnı, buǵan deıin túlekter óz erkimen eki ret UBT tapsyra aldy. Bul oń nátıjesin berip jatyr. Balalar ózderin aldyn ala synap, jattyǵýǵa múmkindik alǵan bolatyn», - deıdi Almas Kenjeǵalın.
Qabyldaý komıssııasynyń málimetinshe, 63 mektep túlegi shekti upaı - 50-di jınaı almady. Endi olar jáne belgili sebepterge baılanysty emtıhanǵa qatysa almaǵan oqýshylar joǵary oqý ornyna túsý úshin UBT-nyń sońǵy 4-kezeńi - 17-20 tamyz aralyǵynda ótetin testileýge qatysyp, baq synaı alady.