Petropavlda turǵyn úı qurylysyna stýdentter tartylmaq

PETROPAVL. QazAqparat – Petropavlda qurylysshy mamandar jetispeıdi. Máseleni sheshý úshin qurylys uıymdary jumysqa stýdentterdi tartpaq, dep habarlaıdy QazAqparat tilshisi.

Petropavl qalasynnyń ákimi Bolat Jumabekovtiń aıtýynsha, qazirgi ýaqytta oblys ortalyǵynda 1020 bos jumys orny bar. Sonyń basym bóligi qurylys salasyna qatysty.

«Petropavlda bıýdjettik 25 úıdiń qurylysy júrip jatyr. Jaqyn arada taǵy 8 úıdi salýdy bastaımyz. Oblys ákiminiń tapsyrmasy boıynsha, biz osy salaǵa jumysshylardy tartyp jatyrmyz.

Qazir jastarǵa jazǵy demalysta jaqsy tabys tabýǵa múmkindik bar. Kezinde bizdiń kópshiligimiz stýdenttik, qurylys otrıadtarynda jáne dala jasaqtarynda jumys istep, tájirıbe jınap, aqsha taptyq. Endi joǵary oqý ornynyń jáne qala kolledjderiniń stýdentterin, onyń ishinde qurylys mamandyqtary boıynsha oqıtyn stýdentter otrıadtaryn qurylysqa jumysqa shaqyramyn», - deıdi qala ákimi.

Bolat Jumabekov qurylys kompanııalarynyń ókilderimen jáne qalanyń qurylys alańdaryna jumysqa ornalasýǵa nıet bildirgen stýdenttermen kezdesti.

«Petropavl qalasynyń qurylys uıymdary maýsym men tamyz aralyǵynda jumysqa 100 adamdy qabyldaýǵa daıyn. Jańa nysandardyń qurylysy bastalysymen qajettilik artady. Jumys istegisi kelgen jastar Petropavl qalasy ákimdiginiń sáýlet jáne qala qurylysy bólimine 8-7152-46-59-56 nómiri boıynsha jáne jumyspen qamtý jáne áleýmettik baǵdarlamalar bólimine 8-7152-40-05-89 nómiri boıynsha habarlasa alady», - deıdi Bolat Jumabekov.

Buǵan deıin Petropavlda bıyl 40-qa jýyq kóp qabatty úıdiń salynyp, paıdalanýǵa beriletinin aıtqan edik.