Petropavlda tótenshe jaǵdaı jarııalandy
«Soltústik Qazaqstan oblysy Petropavl qalasynyń aýmaǵynda jergilikti aýqymdaǵy tehnogendik sıpattaǵy tótenshe jaǵdaı jarııalansyn. Petropavl qalasy ákiminiń orynbasary Á.B. Áýbákirov tehnogendik sıpattaǵy tótenshe jaǵdaıdy joıý boıynsha basshy bolyp taǵaıyndalsyn jáne osy sheshimnen týyndaıtyn tıisti is-sharalardy júrgizý tapsyrylsyn», - delingen «Ashyq» NQA portalynda jarııalanǵan ákimdiktiń sheshim-jobasynda.
Málim bolǵandaı, bul sheshim 7 mamyrda bolǵan órt saldaryn joıý maqsatynda qabyldanǵan.
«Petropavl qalasynda jergilikti aýqymdaǵy tehnogendik sıpattaǵy tótenshe jaǵdaı jarııalaý týraly» sheshim 2023 jylǵy 7 mamyrdaǵy órtten zardap shekken turǵyndardy turǵyn úımen qamtamasyz etý, órt saldaryn joıý maqsatynda qabyldanady. Negizgi mindet - múlikti baǵalaý, órt saldarynan zardap shekken turǵyndarǵa materıaldyq zalaldy óteý jáne turǵyn úı berý», - delingen sheshimge qosymsha berilgen túsindirmede.
Eske salaıyq, 7 mamyr kúni Petropavlda birneshe órt boldy. Tilsiz jaý saldarynan qalada 9 úı, 3 avtobýs jáne kásiporyn garajy órtenip ketti.