Petropavlda tótenshe jaǵdaı rejımin buzǵan 11 adam jaýapkershilikke tartyldy
Soltústik Qazaqstan oblysy polıtsııa departamenti baspasóz qyzmetiniń málimetinshe, ákimshilik jaýapkershilikke tartylǵandardyń basym bóligi komendanttyq saǵatty buzǵandar. Taǵy bir adam spırttik ishimdik satqany úshin jaýap beredi. Barlyq zań buzýshylyqtar boıynsha ákimshilik hattamalar toltyryldy. Tótenshe jaǵdaıdy buzǵany úshin zańnamamen aıyppul salý ne 15 táýlikke deıin ákimshilik qamaýǵa alý túrindegi jaza qarastyrylǵan.
«Barlyq qazaqstandyqtar úshin osynaý qıyn kezeńde azamattardy tótenshe jaǵdaı rejımi talaptaryn qatań saqtaýǵa shaqyramyz. Ýaqytsha engizilgen barlyq shekteýler tek halyqtyń qaýipsizdigi úshin jáne jaǵdaıdy turaqtandyrýǵa baǵyttalǵan. Bizdiń oblysymyzda jaǵdaı turaqty. Halyqtyń quqyqtyq tártip organdaryna zańdy jáne TJ rejıminde belgilengen tártipti múltiksiz saqtaý arqyly qoldaý bildire alady», - deıdi SQO komendanty, PD bastyǵy Marat Tólebaev.
SQO Polıtsııa departamentinde CALL-ortalyǵynyń 8 7152 61-25-42 telefonynyń jumysy uıymdastyryldy. CALL-ortalyǵyna azamattar TJ rejımi kezeńindegi shekteý sharalary boıynsha suraqtarymen júgine alady.
SQO aýmaǵynda saǵat 23.00-den tańǵy saǵat 7.00-ge deıin komendanttyq saǵat engizilgen. Bul ýaqytta úıden shyǵýǵa, sondaı-aq kólik quraldarynyń júrýine tyıym salynady. Petropavl qalasynyń aınalasyna 5 blok-beket qoıyldy. Oblys ortalyǵyna kirý jáne shyǵý shekteldi. Alkogol ónimderin satý quqyǵynsyz kóńil kóterý, oıyn-saýyq oryndary, dámhanalar, meıramhanalar, barlar saǵat 10.00-den 18.00-ge deıin jumys isteıdi. Sonymen qatar, barlyq saýda oryndarynda spırttik sýsyndar satýǵa tyıym salyndy. Jappaı is-sharalardy ótkizýge tyıym salyndy, foto jáne beınejazba júrgizetin tehnıkalardy paıdalaný shekteldi. Tótenshe jaǵdaı rejımi kezeńinde baqylaý-ótkizý rejımi jáne jeke bastaryn kýálandyratyn qujattaryn tekserý, jeke qaraý, kólik quraldaryn tekserý engizildi.