Petropavlda tehnıkalyq qyzmet kórsetý stansasy órtendi
09:15, 18 Aqpan 2024
<p>PETROPAVL. KAZINFORM – Petropavlda órt sóndirýshiler janyp jatqan tehnıkalyq qyzmet kórsetý stansasynan bes mashınany alyp shyqty.</p>
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, saǵat 04:36-da 101 telefonyna Petropavldaǵy tehnıkalyq qyzmet kórsetý stantsııasynyń angarynda órt shyqqany týraly aqparat túsken.
Órt sóndirýshiler kelgende bes qaqpaly ǵımarattyń shatyry tolyq janyp jatqan. Kúrdeligi boıynsha úshinshi shaqyrý nómiri jarııalandy.
Mamandar ekige bólinip, biri órt sóndirýge kirisse, ekinshi top angardan kólikterdi shyǵardy.
Jalpy órtti sóndirýge TJD jeke quramynyń 46 adamy jáne 14 tehnıkasy jumyldyryldy.
5 kólik órt ornynan shyǵaryldy.
Saǵat 06.53-te tehnıkalyq qyzmet kórsetý stansasyndaǵy órt tolyq sóndirildi.
Kelgen shyǵyn men órttiń shyǵý sebebi anyqtalady.