Petropavlda «Tátti kitap» festıvali ótti
«Tátti kitap» festıvali Petropavldaǵy Nazarbaev Zııatkerlik mektebinde ótti. Qyzyqty is-sharaǵa 7-8 synyp oqýshylary qatysty. Olar 10 shańyraqqa bólinip, saıysqa tústi.
«Bul festıvaldi oqýshylar asyǵa kútedi. Balalar kórkem ádebıettiń qyzyqty álemine boılap, oqyǵan shyǵarmalary boıynsha teatrlandyrylǵan qoıylymdar daıyndaıdy. Shyǵarma boıynsha bilimderin kórsetip, qyzyqty kvestterge qatysady.
Bizdiń maqsat – kitap oqýdy nasıhattaý. Mundaı erekshe is-sharalar olardyń kórkem shyǵarmalardy oqýǵa shabyttandyrady degen oıdamyz. Osy maqsatymyzǵa jetip, kitaphanaǵa keletin oqyrmandar sany artady degen úmitimiz bar», - deıdi mekteptiń pedagog-kitaphanashysy Sándigúl Tashetova.
Oqýshylar Tólen Ábdikovtiń «Áke» povesin, Vladımır Korolenkonyń «Detı podzemelıa», Antýan de Sent-Ekzıýperıdiń «Kishkentaı hanzada», Lev Kassıldiń «Hod beloı korolevy», Denıel Kıstiń «Eldjernonǵa arnalǵan gúlder», Berdibek Soqpaqbaevtyń «On altyn jasar chempıon», Oralhan Bókeıdiń «Qaıdasyń, qasqa qulynym», Ǵabıt Músirepovtiń «Ananyń arashasy», Muhtar Áýezovtiń «Qarash-qarash oqıǵasy», Vıktor Astafevtiń «Fotografııa, na kotoroı menıa net» shyǵarmalaryn tańdap, olarmen jan-jaqty tanysty.
Al festıval barysynda balalarǵa ata-analary men mektep muǵalimderi qoldaý kórsetti.
«Osy is-shara arqyly men tort ázirleýdi úırendim, kitap oqydym, sózdik qoryma jańa sózder qostym. Tólen Ábdikovtiń ómirbaıanymen tanystym. Shyǵarma arqyly ata-anany, ózge adamdardy qurmetteýdi, olardy renjitpeı, syılaýdy úırendim», – deıdi mektep oqýshysy Arlan Muhametǵalı.
Al festıvaldiń qorytyndysy retinde oqýshylar ata-analarynyń kómegimen unaǵan shyǵarmalaryn arqaý etip, tort daıyndady. Іs-sharaǵa kelgen qonaqtar 10 shyǵarma týraly bilimderin jetildirip qana qoımaı, «tátti kitaptyń» dámin de tatyp kórdi.
Saıys nátıjesinde birinshi oryndy «Maǵjan Jumabaev», ekinshi oryndy «Jalyn» shańyraǵynyń oqýshylary, al úshinshi oryndy «Esil» shańyraǵynyń oqýshylary ıelendi.