Petropavlda tasyǵan Esil sýy saıajaı ýchaskelerine kirip jatyr

PETROPAVL. QazAqparat – Petropavlda arnasynan shyqqan Esil ózeniniń sýy 30-ǵa jýyq saıajaı ýchaskesin basty. Sý deńgeıi kóterilip keledi, dep habarlaıdy QazAqparat tilshisi.

Petropavl qalalyq tótenshe jaǵdaılar basqarmasynyń bastyǵy Nazymbek Elemesovtiń aıtýynsha, Esil ózeni 16 sáýirden 17 sáýirge qaraǵan túni arnasynan shyǵa bastady. Qazir «Chelıabi-Novosibir» halyqaralyq mańyzy bar avtomobıl joly jabylǵan. Ol jerge beket qoıyldy, tehnıka jetkizilip, polıtsııa men qutqarý qyzmeti kezekshilik atqaryp jatyr.

«Joldyń boıyna arnaıy eskertý belgileri qoıyldy. Qazirgi ýaqytta trassany basqan sýdyń eni 120 metr, tereńdigi 30-35 sm shamasynda. Jaǵdaıdy baqylaýda ustap otyrmyz.

Petropavlda 5 myńǵa jýyq saıajaı ýchaskesi bar. Qazir monıtorıng júrgizemiz. Ázirge qala boıynsha 20-30 saıajaı ýchaskesin sý basty. «Rechport», «Ýchıtel» saıajaı qoǵamdastyǵy, Mıchýrıno eldi mekeninde «Pervenets» saıajaı qoǵamdastyǵy bizdiń baqylaýymyzda», - deıdi Nazymbek Elemesov.

Basqarma bastyǵynyń aıtýynsha, turǵyn úılerge keler qaýip joq. Al saıajaı ýchaskeleriniń keıbiri sý astynda qalady.

«Bul jyldaǵy jaǵdaı deýge bolady. Qazirgi ýaqytta adamdar jyl boıy turatyn saıajaı ýchaskelerine sý kirgen joq.

Jalpy Petropavlda Esil ózeni tasýynyń sharyqtaý shegi 19-20 sáýirde bolady dep boljanǵan», - deıdi Nazymbek Elemesov.

«Qazgıdromet» RMK Soltústik Qazaqstan oblystyq fılıalynyń málimetinshe, Esil ózeni sýynyń deńgeıi Petropavl mańynda bir táýlikte 16 sm kóterildi. Osylaısha 994 sm jetti. Dolmatovo eldi mekeni mańynda mamandar bir táýlikte 27 sm ózgergenin anyqtady.

Óńirdegi qalǵan gıdrologııalyq beketterde sý deńgeıi túsip keledi.