Petropavlda tasqyn sý kirýi múmkin 160-tan astam úı esepke alyndy

PETROPAVL. QazAqparat – Petropavlda qyzyl sý basýy múmkin shaǵyn aýdandardan qar shyǵarý jumystary bastaldy. Qala bıligi tizimdi Tótenshe jaǵdaı departamentiniń usynysyn negizge ala otyryp jasaǵan, dep habarlaıdy QazAqparat tilshisi.

Petropavl qalalyq ákimdigi baspasóz qyzmetiniń málimetinshe, bıyl sý basý qaýpi joǵary kóshelerden qar shyǵarý jumystary 10 kúnge erte bastaldy. Eń aldymen Oıqala, «Bereke», «Solnechnyı-2» jáne Jumysshy kenti qardan tazartylmaq.

«Kúndelikti qar shyǵarýǵa 110 arnaıy tehnıka jumyldyrylǵan. Sonyń ishinde 38 tıegish mashına bar. Polıgonǵa kúnde 11 myń tekshe metr qar jetkiziledi. 9 naýryzdan bastap 300 myń tekshe metrden astam qar shyǵaryldy.

Turǵyndar da qoldan kelgenshe kómektesip jatyr. Tehnıka kelgenin kórip, kúrekterin alyp shyǵady, aýlalaryn qardan tazartyp jatyr», - deıdi qar shyǵarýmen aınalysyp jatqan JShS dırektorynyń orynbasary Anar Býhanov.

Petropavlda 100 myń metr ashyq sýaǵar bar. Qazirgi ýaqytta olar qoqystan, muzdan tazartylyp jatyr. 6 brıgada 20 arnaıy tehnıka jumys isteýde.

«Bereke, Oıqala jáne Jumysshy kentterinde jumys isteımiz. Bıyl kóktemniń erte kelýine baılanysty iske de jyldaǵydan erte kiristik. 20 aqpanda brıgadalarymyz kóshege shyqty. Sodan beri demalys joq. Kelesi aptada jabyq kárizdik júıelerge bý jáne sý jiberip tazalaýdy bastaımyz», - deıdi «Tazartqysh, sý taratqysh jáne sý ótkizgish ǵımarattar» MKK basshysy Pavel Býlaev.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, Petropavlda kóktemde sý basýy múmkin 166 úı esepke alynǵan. Bul baspanalarda myńǵa jýyq turǵyn turady.