Petropavlda tasqynnan zardap shekkender kommýnaldyq qyzmetke aqy tólemeıdi

<p>PETROPAVL. KAZINFORM &ndash; Petropavl ákimi Serik Muhamedıev sý tasqynynan zardap shekkenderge tólenetin bir rettik ótemaqyǵa qatysty túsinik berdi. Óıtkeni buǵan deıin turǵyndarǵa 200 aılyq eseptik kórsetkish mólsherinde dep aıtylyp, keıin ol soma eki ese qysqarǵan bolatyn.</p>

«4 sáýirde men Petropavlda jergilikti aýqymdaǵy tótenshe rejımin jarııaladym. Osy eki aptada biz kóp nárseni bastan ótkerdik. Ádettegi ómir saltymyz buzyldy. Qazir eń bastysy – turǵyndardyń shyǵynyn qalpyna keltirý. Sý áli ketken joq jáne kelgen shyǵynnyń mólsheri týraly aıtýǵa áli erte. Biraq biz qazirdiń ózinde sharalar qabyldap, onyń ornyn toltyrý tetikterin pysyqtap jatyrmyz», - dedi áleýmettik jelidegi paraqshasynda Petropavl ákimi. 

Eki kún buryn zardap shekkenderden barlyq tólemderge ótinishter qabyldaý bastaldy.

Osy aralyqta myńnan astam adam júgingen. 

«Búginnen bastap 100 AEK mólsherinde birjolǵy ótemaqy tóleý bastaldy. Tıisti tapsyrma berildi. BAQ-ta ótemaqy mólsherin 200-den 100 AEK-ke deıin tómendetilgeni týraly aqparat jazylyp jatyr. Túsindireıin. Tótenshe jaǵdaı jarııalanǵan sátte Petropavlda máslıhattyń 100 AEK tóleý týraly sheshimi qoldanyldy. Iá, shynynda da, qalalyq máslıhattyń 8 sáýirde ashyq derekkózderde jarııalanǵan sheshimimen turǵyn úı ıeleri úshin birjolǵy tólem somasyn 100-den 200 AEK-ke deıin ulǵaıtý kózdelgen. Biraq bul másele sol kezde tek talqylaý satysynda boldy jáne zańdy kúshine enbedi. Tótenshe jaǵdaı odan buryn jarııalanǵan bolatyn. Zardap shekken shaǵyn aýdandardyń turǵyndary ǵana emes, úı retinde qoldanylyp kelgen saıajaı ıeleri de birjolǵy tólem alady», - dedi Serik Muhamedıev.

Petropavl ákimi, sondaı-aq, úıleri sýǵa ketken turǵyndardan qazirgi ýaqytta kommýnaldyq aqy alý durys emestigin aıtyp, bul kezeńde tólemnen bosatylatynyn jetkizdi. 

Buǵan deıin Petropavl men Qyzyljar aýdanynda áli de sý tasqynyna qatysty qaýip seıilmegenin aıtqan edik.