Petropavlda tasqynnan zardap shekken 53 otbasy jańa úıge kirdi
Jańa úılerdiń alǵashqy legi tasqynnan zardap shekken otbasylarǵa saltanatty túrde tabys etildi. Bul baspanalar «Qazaqstan halqyna» qorynyń qarjysyna turǵyzyldy. Qurylys 24 sáýir kúni bastalyp, qysqa merzimde aýdany 80 sharshy metr bolatyn, úsh bólmeli úıler sapaly da, jaıly baspanalar paıdalanýǵa berildi.
«Buǵan deıin bolmaǵan aýqymdy sý tasqyny soltústikqazaqstandyqtardyń aýyzbirshiligin kórsetti. Óńirge kelgen Memleket basshysy eshkimniń de qoldaýsyz qalmaıtynyn aıtyp, zardap shekkenderdiń qorqynyshyn seıiltti, úmit syılady. Prezıdenttiń úndeýin «Qazaqstan halqyna» qoǵamdyq qorynyń tóraǵasy Bolat Jámishev te qoldap, qarjylaı kómek kórsetti. Alǵashqy 100 úıdiń qurylysyna qarajat bóldi», - dedi Soltústik Qazaqstan oblysynyń ákimi Ǵaýez Nurmuhambetov.
Búgin baspanaly bolyp, kóppen birge qýanyp jatqandardyń biri – Nursulý Myrzahmetovanyń otbasy. Erli-zaıypty osydan 6 jyl buryn Jambyl aýdany Rojdestvenka eldi mekeninen qonys aýdarǵan. Petropavldaǵy Oıqala shaǵyn aýdanyndaǵy sýǵa ketken eski úıdiń aýdany 40 sharshy metr bolsa, endi eki ese keń, jaryq ta, jaıly úıge qonys aýdarmaq.
«13 sáýir kúni úıimizdi sý basty, qatty ýaıymdadyq. Búgin endi qýanyshym qoınyma syımaı tur. Prezıdentke, oblys ákimine alǵysym zor. Osy úıdiń salynyp bitýine jaǵdaı jasaǵan bárine raqmet aıtamyn. Bizdiń jolymyzdy basqalarǵa berip, olar da osylaı qýansyn. Biz ómir boıy jer úıde turyp kelemiz. Sondyqtan da tańdaý birden osy shaǵyn aýdanǵa tústi. Úshinshi toptaǵy múgedektigim bolsa da, baý-baqsha ekkendi, gúl ósirgendi unatamyn. Jańa úı óte unady, alǵysym sheksiz», - deıdi Nursulý Myrzahmetova.
Qonys toı ıelerine jańa úıdiń kiltimen birge jıhaz ben turmystyq tehnıkany tegin alýǵa múmkindik beretin sertıfıkat ta tabys etildi. Bul – «ZIKSTO» AQ syıy. Zaýyt osy maqsatqa 700 mln teńge bóldi.
«Búginnen bastap bizdiń turǵyndarda jańa ómir bastalady. Sizderdiń árqaısylaryńyz úshin eń bastysy baspana ekenin túsinemiz. «Qazaqstan halqyna» qory sý tasqynynan zardap shekken basqa óńirlerge de osyndaı úıler turǵyzýǵa qarjy bóldi. Bul – Atyraý, Qostanaı, Batys Qazaqstan, Aqmola oblystary. Men Soltústik Qazaqstan oblysynyń ákimdigine rızamyn, tez arada baspanalardy turǵyzyp, búgin aldyn berip jatyr. Sizder Qazaqstan boıynsha salynǵan úılerge birinshi bolyp kirip jatyrsyzdar», - dedi «Qazaqstan halqyna» qory tóraǵasynyń orynbasary Lázzat Shyńqysbaeva.
Shaǵyn aýdanda qazirgi ýaqytta 90 orynǵa shaqtalǵan balabaqshanyń qurylysy júrip jatyr. «Jaıly mektep» jobasy aıasynda mektep te salynbaq.
Buǵan deıin BQO-da sýǵa ketken egistik, baý-baqsha alqaptarynyń shyǵyny anyqtalyp jatqanyn jazǵan edik.