Petropavlda tanystaryn aldap, 7 mln teńgeni ıelengen alaıaq sottaldy
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń 24 jastaǵy turǵyny 2018 jyldan beri túrli syltaý aıtyp tanystarynan aqsha alyp kelgen. Bireýine shetel bankinde qomaqty qarajaty baryn, ol aqshany sheship alý úshin mindetti tólem men penıa tóleý qajet ekendigin aıtyp, qaryz alǵan. Endi birinen avtokóligin jóndeýge, keıin basqasyn alýǵa, ony qaıta tirkeýge qaryzǵa aqsha suraǵan. Tipti tanysynyń biriniń bank rekvızıtterin jáne qosymshasynyń qupııa sózin alyp, sol arqyly nesıe resimdegen.
2021 jyly taǵy bir tanysynan týysyn jerleý rásimine dep aqsha suraǵan. Alaıaq barlyǵy jeti adamdy san soqtyrdy. Keltirilgen shyǵyn 7 mln teńgeden asady.
«Tergeý barysynda jigit alaıaqtyq jolmen tapqan aqshasyn qumar oıynǵa jumsaǵanyn aıtty. Oınaǵan saıyn qaryzy kóbeıe túsken, ol jaqyn tanystarynyń qarjylaı jáne quqyqtyq saýatsyzdyǵyn paıdalanyp, alaıaqtyqqa barǵan.
Qazirgi ýaqytta ol 5 jylǵa bas bostandyǵynan aıyrý túrindegi jazasyn ótep jatyr. Qarjy máselesine kelgende asa abaı bolýǵa keńes beremiz, qupııa derekterińizdi eshkimmen bólispeńizder», - deıdi Petropavl qalalyq polıtsııa basqarmasy tergeý bóliminiń bastyǵy Nurjan Omarov.