Petropavlda sýǵa ketken bala tabylmaı jatyr
Soltústik Qazaqstan oblysy Qazaqstan halqy Assambleıasynyń volonteri Alena Pısarenkonyń aıtýynsha, 10 jasar bala 14 maýsym kúni saǵat 15.00 shamasynda Esil ózeniniń Zaısan shaǵyn aýdany mańynda sýǵa batyp ketken. Bala dostarymen shomylýǵa barǵan eken.
Іzdestirý jumystary kesheden beri júrgizilip jatyr.
«Barlyq volonterlerdi, eriktilerdi kómekke shaqyramyz. Qaıyqtaryńyzdy ala kelseńizder. Ózderińizben birge rezeńke etik, qol sham bolǵany durys, óıtkeni ózen jaǵasyn sholyp ótý qajet», - dedi Alena Pısarenko.
SQO tótenshe jaǵdaılar departamenti baspasóz qyzmetiniń málimetinshe, balany izdeýge jeke quramnan 13 adam – súńgýirler jáne 5 arnaıy tehnıka tartylǵan.
«Esil ózeninde izdestirip jatyrmyz. Volonterler de, polıtsııa da osy jerde. Ázirge nátıje joq», - dep jaýap berdi vedomstvonyń baspasóz hatshysy Evgenıı Jýravlev.
Buǵan deıin SQO-da otbasynyń astan ýlanyp, eki balanyń qaıtys bolǵanyn jazǵan edik.