Petropavlda sý basqan aýmaqta baılaýly qalǵan ıt qutqarýshysynyń qolynda kúshiktedi

<p>PETROPAVL. KAZINFORM &ndash; Petropavlda turǵyndardyń keıbiri sý tasqynyna baılanysty qaýipsiz aýmaqqa kóshkende úı janýarlaryn qaldyryp ketken. Olardy áskerı qyzmetshiler men polıtseıler qutqaryp jatyr.&nbsp;</p>

Petropavldaǵy Teplıchnoe eldi mekeninde ornalasqan saıajaı qaýymdastyqtaryna reıd barysynda 99275 áskerı bólimi aýmaqtyq qorǵanys batalonynyń mamandary baılaýly turǵan ıtti baıqap qalady. Qasyndaǵy úı turǵyndary da ıtin baılaýly qaldyryp ketipti.

Foto: Asqan Rahımov

 

«Sur ıt te, qara ıt bizge tipti úrgen de joq, qutqarýǵa kelgenimizdi sezgendeı. Olar ıt úıshiginiń ústinde otyrdy. Efreıtor Mereı Nurǵojın ıtti kótergen kezde, ol qolynda kúshiktep, ózi sııaqty qara kúshikti týdy», - deıdi batalonnyń barlaý vzvodynyń komandıri Asqan Rahımov.

Áskerı qyzmetshiler sońǵy bir aptanyń ishinde ǵana qaýipti aýmaqtan 13-18 úı janýaryn qutqarǵan.

«Adamdar úreıge boı aldyryp, barlyǵyn tastaı qashady. Keıbiri osylaısha ıtterin de bosatpaı ketedi. Bir úıdiń qorasynan qamalyp turǵan qoılardy taptyq. Syrtynan jaýyp ketken. Taǵy bir úıdiń qorasynan qoıandardy alyp shyqtyq. Kóbine taýyqtardy shyǵardyq. Múmkin aparatyn jerleri bolmaǵan shyǵar. Biraq biz sý tasqynyna deıin úı-úıdi aralap, úı janýarlaryn bizge berińder, olardy arnaıy evakýatsııalyq orynǵa jetkizemiz dep aıttyq. Mysaly Zarechnyı kentinde biz ıtterdi áketip, olardy mekteptiń janyna baıladyq. Osylaısha biz jáne volonterler tamaqtandyryp otyrdyq», - deıdi Asqan Rahımov.

Mamannyń aıtýynsha, qutqarylǵan janýarlar tótenshe jaǵdaılar jónindegi departament qyzmetkerlerine tabystalady. Al olar shara qoldanyp, ornalastyrady.

Buǵan deıin Beskól aýylynda 109 úıdiń sý astynda qalǵanyn aıtqan edik.