Petropavlda stýdenttik qurylys jasaqtary tasqynnan zardap shekkenderdiń úılerin salýǵa kómektesedi
Bul – «Aýyl» HDPP bastamasymen qolǵa alynyp otyr. El aýmaǵynda bolǵan sý tasqyny zardaptaryn joıý úshin Jastar stýdenttik qurylys jasaqtaryn qaıta jandandyryp, zardap shekkenderge naqty kómek kórsetý jaıynda Úndeý jasalǵan edi.
«Jastar tarapynan qoldaý taptyq. Jergilikti joǵary oqý orny men kolledjderdiń stýdentteri kómek kórsetýge daıyn ekenin aıtyp otyr. Bul – qýanarlyq jaıt. Osy jaǵdaı bastalǵaly partııa janynan jedel shtab qurdyq. Eki maqsat alǵa qoıyldy. Birinshisi – jastardyń qurylys kezindegi qaýipsizdigi. Ekinshisi – olardyń eńbeginiń baǵalanýy. Endi olar jas azamattar ǵoı, tabys tabýy kerek. Sondyqtan biz jastarmen kelistik. Osy eki aıda kem degende 450-500 myń teńge tabady dep esepteýdemiz. Kelisimshartqa otyrady. Barlyq jumys qurylys bitkenshe qadaǵalanady», - deıdi «Aýyl» partııasynyń tóraǵasy, Májilis depýtaty Serik Egizbaev.
«Aýyl jastary» qurylys jasaǵynyń quramynda 40 jas bar. Taǵy 40 stýdent rezervte tur. Qazirgi ýaqytta Solnechnyı-2 kentinde tasqynnan zardap shekkenderge arnalyp 500-den astam baspana salynyp jatyr. Jastar osy alańda eńbek etedi. Tańǵy saǵat 9.00-den 18.00-ge deıin jumys isteıdi, túski aspen tegin qamtylmaq.
«Bul – úlken qoǵamdyq áleýmettik mańyzy bar joba. Bir jaǵynan, jastar jasaǵy zardap shekken otandastarǵa sý tasqyny zardaptaryn joıýǵa kómektesse, ekinshi jaǵynan, stýdent jastardyń jazǵy demalys kezinde eńbekke aralasyp, tabys tabýyna múmkindik beredi. Basqa óńirlerde de jumysty jalǵastyramyz. Máselen Qaraǵandy jastary basqa oblystarǵa baryp, kómek kórsetýge daıyn ekendikterin jetkizdi», - deıdi Serik Egizbaev.
Buǵan deıin sý basqan óńirlerden 23 myń adamnyń poıyzben kóshirilgenin aıtqan edik.