Petropavlda skýter júrgizýshisi zeınetkerdi qaǵyp ketti
Soltústik Qazaqstan oblysy polıtsııa departamenti baspasóz qyzmetiniń málimetinshe, 18 mamyr kúni Petropavldaǵy Egemen Qazaqstan jáne Qazaqstan Konstıtýtsııasy kósheleriniń qıylysynda joldy belgilenbegen jerden ótpek bolǵan 75 jastaǵy qala turǵynyn WorteX skýteri soǵyp ketti. Rýlde 16 jastaǵy stýdent bolǵan. Zeınetker áıel medıtsınalyq mekemege jetkizilip, kómek kórsetilgennen keıin úıine jiberildi.
«Qala turǵynyna qatysty Ákimshilik quqyq buzýshylyq týraly kodeksiniń 615-baby «Jaıaý júrginshilerdiń jáne jol júrisine ózge de qatysýshylardyń jol júrisi qaǵıdalaryn buzýy» boıynsha hattama toltyryldy. Barlyq jol qozǵalysy qatysýshylaryn jolda júrý erejelerin qatań saqtaýǵa shaqyramyz. Máselen, jyl basynan oblys ortalyǵynda jaıaý júrginshiler men jol júrisine ózge de qatysýshylardyń, onyń ishinde velosıpedshilerdiń, gıroskýter, elektr samokattardyń ıelerin qosa alǵanda 2 myńǵa jýyq jol qozǵalysy erejesin buzý deregi tirkeldi», - deıdi Petropavl qalalyq polıtsııa basqarmasy bastyǵynyń birinshi orynbasary Álibek Ǵabdýllın.
Polıtseılerdiń aıtýynsha, kún jylynǵaly jolda mopedter men skýterler kóbeıgen. Osyǵan oraı tártip saqshylary jol-kólik oqıǵalarynyń aldyn alý jáne jol qozǵalysy qaýipsizdigin qamtamasyz etýdi nyǵaıtý boıynsha profılaktıkalyq jumysty júrgizedi.
«Tájirıbe kórsetkendeı, eki dóńgelekti kóliktiń júrgizýshileri jol qozǵalysy erejelerin tolyq bilmeıdi. Júrgizýshiler men jaıaý júrginshiler de olardy jol qozǵalysynyń tolyqqandy qatysýshylary retinde qabyldamaıdy. Bul apatty jaǵdaıǵa alyp kelýi múmkin», - deıdi Álibek Ǵabdýllın.