Petropavlda skýter júrgizýshisi halyq jaıaý júretin kóshemen polıtsııadan qashty

PETROPAVL. QazAqparat – Petropavlda jaryǵyn jaqpaǵan jáne qorǵanys bas kıimin kımegen skýter júrgizýshisi polıtsııanyń nazaryn aýdaryp, halyq jaıaý júretin kóshemen qashty, dep habarlaıdy QazAqparat tilshisi.

Áleýmettik jelide ótken túni Petropavldaǵy jaıaý júrginshilerge arnalǵan Qazaqstan Konstıtýtsııasy kóshesinde saǵat 23.30 shamasynda bolǵan oqıǵanyń beınejazbasy tarady. Polıtsııa kóligi skýterdiń sońyna túsip, odan toqtaýyn talap etti.

Petropavl qalalyq polıtsııa basqarmasynyń málimetinshe, oqıǵa 25 shilde kúni saǵat 23.35 shamasynda bolǵan. Petropavl qalalyq polıtsııa basqarmasynyń patrýldik polıtsııa batalonyna Pestroe kóli jaǵynan Jambyl kóshesinde skýter kele jatqany jáne onyń júrgizýshisi mas bolýy múmkin ekeni jóninde habar túsken.

Sondaı-aq skýterdi basqarǵan er adamda jáne onyń jolaýshysynda jeke qorǵanysh quraldary bolmaǵan. Kóliktiń jaryǵy da jaǵylmaǵan. Er adam tártip saqshylarynyń toqtaýdy buıyrǵan zańdy talabyn elemeı, qashyp ketýge tyrysty. Ol baǵdarshamnyń qyzyl túsine ótip, polıtseılerden qutylý úshin ádeıi jaıaý júrginshiler júretin kóshege shyqqan.

«Aınaladaǵy adamdardy, kóshedegi júrginshilerdi daýys zoraıtqysh arqyly eskertken avtopatrýl qyzmetkerleri qashyp qutylýǵa tyrysqan skýterdiń sońynan erip otyrýǵa májbúr boldy.

Skýter júrgizýshisin izdeý jumystary áli de júrgizilip jatyr», - delingen habarlamada.