Petropavlda sıntetıkalyq esirtkini zertteıtin ortalyq ashyldy

<p>PETROPAVL. KAZINFORM &ndash; Petropavlda sıntetıkalyq esirtkiniń quramyn zertteıtin ortalyq ashyldy. Zerthana 24 saǵat ishinde tyıym salynǵan zat boıynsha qorytyndy bere alady.</p>

Soltústik Qazaqstan oblysy boıynsha sot saraptamasy ınstıtýtynyń málimetinshe, jańa zerthana esirtkige qatysty qylmystyq isterdi tezirek ashýǵa septigin tıgizbek. Óıtkeni buryn sıntetıkalyq esirtki ekenin rastaý úshin mamandar ony Kókshetaýǵa nemese Astanaǵa jiberýge májbúr bolǵan.

«Ázirge testileý rejıminde jumysty bastadyq. Sıntetıkalyq esirtkilerdi ózimizde anyqtaý arqyly tergeýshilerdiń jumysyn jeńildetemiz. Zerthanada eki sarapshy bolady, taǵy ekeýi qurylǵylarmen tikeleı jumys isteıdi. Olar qazir biliktilikterin arttyryp jatyr», - deıdi SQO boıynsha sot saraptamasy ınstıtýty dırektorynyń orynbasary Mádına Andosova.

Mamandar bir nysandy zertteýge 20 mınýt jumsamaq. Al jalpy saraptama qorytyndysy 24 saǵat ishinde beriledi.

«Gazdy hromatograf» dep atalatyn qurylǵy esirtki zatyndaǵy qospalardyń túrin kórsetedi. Jalpy bizge túsken preparat úsh kezeńdik saraptamadan ótedi. Sıntetıkalyq esirtki birneshe qospadan jáne keıbiriniń mólsheri tym az bolsa da osy jabdyqtardyń arqasynda biz esirtki jaıynda tolyq aqparat alamyz. Sıntetıkalyq esirtkilerdiń túrleri jyldan-jylǵa kóbeıip jatyr. Barlyq ádisterdiń jıyntyǵy nátıjesinde biz jalpy qorytyndyǵa kelemiz», - deıdi esirtki quraldaryn, psıhotroptyq zattardy, olardyń analogtary men prekýrsorlaryn zertteý jónindegi bas sarapshy Rýslan Sháripov.

Sıntetıkalyq esirtkimen kúres ózekti. Máselen tek Petropavlda jyl bastalǵaly beri esirtkige qatysty 132 qylmys tirkelip, 28 adam sottaldy. Jazasyn ótep jatqandardyń basym bóligi – 25 jasqa deıingi jastar.

«Qazirgi sıntetıkalyq esirtkilerdiń hımııalyq qurylymy aýyr, ári bir orynda turmaı únemi ózgerip otyrady. Saldarynan anyqtaý qıyndyq týdyryp jatady. Sondyqtan prokýratýranyń bastamasymen búgingi zerthana ashylyp otyr. Ol zamanaýı qondyrǵylarmen jaraqtandyrylǵan. Maqsat – jedel túrde esirtki quramyn sapaly anyqtap qana qoımaı, ǵylymı bazanyń damýyna jaǵdaı jasaý», - deıdi Petropavl qalasynyń prokýrory Tynybek Saparov.

Buǵan deıin SQO prokýratýrasy bos jatqan jerlerdi anyqtap, 25 myń ga alqapty memleket menshigine qaıtarǵanyn jazǵan edik.