Petropavlda saıajaı qoǵamyndaǵy úılerdiń birinen 50-den astam eliktiń eti tabyldy

PETROPAVL. QazAqparat – Petropavldyń 3 turǵyny 50-den astam elikti zańsyz atty degen kúdikke ilindi. Olardyń kóliginen jáne saıajaı qoǵamyndaǵy úılerdiń birinen bas-sıraǵy men terisi jáne ekeýiniń tutas eti tabyldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, uıymdasqan qylmysqa qarsy kúres basqarmasynyń qyzmetkerleri oblystyq polıtsııa vedomstvosynyń basqa bólimshelerimen birlesip, asa iri mólsherde zańsyz ań aýlady degen kúdikpen Petropavldyń úsh turǵynyn ustady.

Uıymdasqan qylmysqa qarsy kúres basqarmasyna Petropavl turǵyndarynyń birinde tirkelmegen qarýdyń bolýy múmkin ekendigi týraly aqparat túsedi.

27 aqpanda tańerteń «Chelıabi-Novosibir» tasjolynyń 525 shaqyrymynda tekserý barysynda polıtsııa qyzmetkerleri 28 jastaǵy Petropavl turǵynynyń basqarýyndaǵy «VAZ-2115» avtokóligin toqtatty. Salonda 29 jáne 30 jastaǵy taǵy eki oblys ortalyǵynyń turǵyny bolǵan. Avtokóliktiń júksalǵyshyn qaraý kezinde soıylmaǵan 4 sibir eligi, sondaı-aq «TOZ» markaly eki tirkelmegen tegis uńǵyly myltyq, 2 patron, gılza jáne basqa da ańshylyq qural-jabdyqtar tabylyp, tárkilendi.

«Budan ári is-sharalardy ótkizý barysynda Petropavldaǵy saıajaı qoǵamdarynyń birindegi úıden eki eliktiń múshelenbegen eti, 41 eliktiń terisi, 119 tuıaq, 12 ańnyń basy tabyldy. Bul fakt QR Qylmystyq kodeksiniń 337-babynyń 3-bóligi «Zańsyz ańshylyq» boıynsha sotqa deıingi tergep-tekserýlerdiń biryńǵaı tizilimine engizildi. Tárkilengen qarý men ańdardyń sıraq-basy, terisi men eti saraptamaǵa jiberildi. Kúdiktiler Petropavl qalalyq polıtsııa basqarmasynyń ýaqytsha ustaý ızolıatoryna qamaldy», - deıdi SQO PD uıymdasqan qylmysqa qarsy kúres basqarmasynyń bastyǵy Jandos Basybaev.

Ustalǵandar endi zańsyz ańshylyq úshin 5 myń AEK mólsherinde aıyppul tóleýi nemese 5 jylǵa deıin bas bostandyǵynan aıyrylýy nemese qoǵamdyq jumystarǵa 1200 saǵatqa jegilýi múmkin.