Petropavlda saıası qýǵyn-súrgin qurbandaryn eske aldy

PETROPAVL. QazAqparat - Petropavl qalasynda saıası qýǵyn-súrgin jáne totalıtarızm qurbandaryna arnalǵan monýmentke gúl shoqtary qoıylyp, mıtıng ótti, dep habarlaıdy QazAqparat tilshisi.

Óńirlik kommýnıkatsııalar qyzmetiniń málimetinshe, saıası qýǵyn-súrgin qurbandaryn eske alyp, rýhtaryna taǵzym etýge olardyń urpaqtary, qalanyń zııaly qaýymy, oqýyshylar men stýdentter keldi. Saltanatty is-sharaǵa qatysqan oblys ákiminiń orynbasary Rýslan Álishevtiń aıtýynsha, Qazaqstanda 135 myń adam qýdalaýǵa ushyrap, sonyń 25 myńnan astamy atylǵan.

«Soltústik Qazaqstanda 1930-50-shi jyldar aralyǵynda 7 myń 600 adam repressııaǵa ushyrady. «Halyq jaýy» atanǵan 1 465 soltústikqazaqstandyq atý jazasyna kesildi. Olardyń ishinde Maǵjan Jumabaev, Smaǵul Sádýaqasov, Nyǵmet Syrǵabekov, Qaısar Táshkıtov, Jumaǵalı Tileýlın jáne taǵy basqalary bar. Tek qazaqtar ǵana emes, basqa ulttar da zardap shekti. 1,5 mln-nan astam adam Qazaqstanǵa jer aýdaryldy», - dedi Rýslan Álishev.

Petropavlda 2012 jyly kezinde NKVD túrmesi ornalasqan jerde eskertkish ashyldy. Monýmentke 1628 adamnyń esimi jazylǵan. Negizgi tizim Memlekettik qaýipsizdik komıtetiniń arhıvinen alynǵan. Eskertkish «Pamıat» qoǵamdyq qorynyń tóraǵasy Bolat Saǵyndyqovtyń bastamasymen boı kóterdi.

«Eskertkishti ashýdy azamattyq boryshymyz dep eseptedik. Qoǵamdyq qordyń qurylǵanyna 16 jyl. Sol 16 jyl boıy saıası qýǵyn-súrgin qurbandarynyń esimderin anyqtap, halyq jadynda qaldyrý úshin jumys istedik. «Eske alý taqtasyna» qýdalaýǵa ushyraǵan bizdiń áke-sheshemizdiń esimderi jazyldy. Qazir osy memorıal janynan mýzeı salý máselesi qarastyrylyp jatyr», - deıdi Bolat Saǵyndyqov.