Petropavlda saýyqtyrý kesheni bir emes, eki ret órtendi

PETROPAVL. QazAqparat – Petropavlda saýyqtyrý keshenindegi órtti eki ret sóndirýge týra keldi. Ótken túnde bastalǵan órt tolyq sónbeı qalyp, ekinshi kúni tańerteń mamandar taǵy da sol nysanda jumys istedi. Qaza tapqandar, zardap shekkender joq, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, Petropavldaǵy «Parkovaıa» saýyqtyrý kesheninde órt shyqqandyǵy týraly habar 14 qańtarda saǵat 23:45-te túsken. Órt sóndirýshiler jetkende nysan otqa oranǵan. Mamandar jalynmen úsh jaqtan kúresip, saǵat 2:00 shamasynda sóndirdi. Oqıǵa ornynda 41 adam, 11 tehnıka jumys istedi.

«Órttiń saldarynan ot jaǵý bólmesi, demalys bólmesi, kir jýatyn bólme janyp ketti jáne keshenniń shatyry tolyqtaı zaqymdandy. Órt jalmaǵan aýmaq – 160 sharshy metr. Qaza tapqandar men zardap shekkender bolǵan joq», - delingen habarlamada.

Alaıda, 15 qańtar kúni tańerteń qaıtadan órt shyqqan. Belgili bolǵanyndaı, órt túnde tolyq sóndirilmeı, qýysta byqsyp qalyp qoıǵan.

«Qaıta órt shyqpaýy úshin oqıǵa ornynda barlaýshylar qaldyryldy. Olar tańerteń jylý ustaǵysh materıaldardyń byqsyp jatqanyn baıqap qalǵan. Kúrdeli qurylystan ol jerge mamandar túnde jete almaǵan. Saǵat 11:00 shamasynda jaǵdaı turaqtandy. Keshende órt sóndirýshiler áli de jumys istep, baqylaýda ustap otyr», - deıdi baspasóz qyzmetiniń mamandary.

Aldyn ala boljam boıynsha, peshti qoldaný barysynda órt qaýipsizdigi erejeleri saqtalmaǵan.