Petropavlda salynyp jatqan kóp qabatty úılerge negizinen otandyq materıaldar qoldanylýda
Qazirgi ýaqytta Petropavlda 41 kóp qabatty turǵyn úıdiń qurylysy júrip jatyr, onyń 23-i bıýdjettik, qalǵan 18-i kommertsııalyq. Máselen, Ýálıhanov kóshesiniń boıynda 3 jáne Pervoımaı, 2 kóshesinde bir toǵyz qabatty úı salynyp jatyr. «Osnovanıe» kompanııasy munda jumysty byltyr shilde aıynda bastaǵan.
«Ýálıhanov kóshesiniń boıynda eki 72 páterlik jáne bir 126 páterlik turǵyn úıdi salyp jatyrmyz. 72 páterlik baspananyń jalpy aýdany – 2,5 myń sharshy metr. 1,2,3 páterli bolady. Aýdandary 71, 54 jáne 39-42 sharshy metr. Tolyq abattandyramyz, ıaǵnı balalar alańyn, kólik turaqtaryn salamyz. Qalǵan eki nysanda jumystar aıaqtalýǵa jaqyn», - JShS dırektorynyń orynbasary Roman Tyrtyshnyı.
Bul jerde kezinde qabyrǵasy jartylaı jerge kirgen eski jeke úıler bolǵan. Olardyń barlyǵy syryldy. Ornyna salynyp jatqan úsh úı bıyl jazda paıdalanýǵa berilmek.
Qurylys alańynda 10 tehnıka, 40-50 jumysshy júr. Qysta atqarýǵa bolatyn jumystar: kirpish qalaý, elektrmontajdaý júrgizilip jatyr.
«Qurylysty osy jyldyń shilde aıyna deıin aıaqtaımyz dep josparlap otyrmyz. Mamandar jetkilikti, qurylys materıaly bar, barlyǵy otandyq ónim. Bloktardy, esik-terezelerdi ózimiz shyǵaramyz. Tsehtarymyz jumys isteıdi. Budan basqa da salyp jatqan úılerimiz bar. Petropavldyń «Jas órken» shaǵyn aýdanynda 18 qabatty eki úıdi, Bereke aýdanynda 100 páterli úıdi turǵyzyp jatyrmyz», - deıdi Roman Tyrtyshnyı.
Mamandardyń aıtýynsha, salynyp jatqan kóp qabatty úılerdiń barlyǵy da ıpotekalyq nesıege «Baqytty otbasy» jáne «Nurly jer» memlekettik baǵdarlamalary aıasynda berilmek. Jalpy aldaǵy 5 jylda oblys aýmaǵynda memlekettik baǵdarlamalardyń aıasynda 90-ǵa jýyq kóp qabatty úı salynady. Sonymen qatar ońtústikten kóship keletin azamattarǵa 1500-ge jýyq jeke baspana turǵyzý kózdelgen.
Petropavlda jańa kóp qabatty turǵyn úılerdi turǵyzý úshin 2017 jyldan beri 1700-ge jýyq eski jeke baspanalar súrildi. Nátıjesinde 4800 adam turǵyn úı jaǵdaıyn jaqsartty.