Petropavlda respýblıkalyq teatr festıvali bastaldy

<p>Petropavlda Qazaqstan drama teatrlarynyń HHІH respýblıkalyq fesıvali bastaldy. Bıyl ol kórnekti qoǵam jáne memleket qaıratkeri Temirbek Júrgenovtyń 125 jyldyǵyna arnaldy, dep habarlaıdy <a href="https://kaz.inform.kz/" target="_blank" rel="noopener">Kazinform </a>agenttigi.</p>

Dástúrli teatr festıvali Petropavlda bir apta ótedi. Sarapshylar keńesiniń súzgisinen ótken 10 spektakl óner súıer qaýymnyń nazaryna usynylady. Qoıylymdardy S.Muqanov atyndaǵy qazaq-sazdy drama teatry men N.Pogodın atyndaǵy orys drama teatrynan kórýge bolady, kirý tegin.

- Festıvaldi Túrkistan teatrynyń ujymy ázirlegen «Maǵjan» spektaklimen ashtyq. Zalda ıne shanshar jer bolmady, halyq tipti jerge otyryp qoıylymdy tamashalady.

Festıvaldiń Petropavlda ótip jatqany jergilikti kórermenderge úlken syı. Úzdik degen spektaklderdi kórý múmkindigine ıe bolyp jatyr.

Jalpy bul festıvaldiń bereri kóp. Ár spektakl bitkennen keıin qazylar alqasy talqylaıdy. Ónertanýshylar, synshylar ár qoıylymnyń jaqsy jerin atap, synyn aıtady. Akterler bir-biriniń oıynyn kóredi, tájirıbe almasady. Teatr óneriniń qazirgi deńgeıi qandaı, qaı baǵytta ketip baramyz, nege nazar aýdarý kerek – bul úlken sheberlik synyby dep te aıtýǵa bolady, - deıdi S.Muqanov atyndaǵy qazaq sazdy-drama teatrynyń dırektory Birjan Jalǵasbaev.

Qazylar alqasy 5 adamnan quralǵan, bıylǵy ereksheligi – teatr synshylarynyń barlyǵy – áıel adamdar.

- Uıymdastyrý barysynda sarapshylar keńesine 30-ǵa jýyq spektakl usynyldy. Sonyń tańdap alynǵan onynyń janry da, qatysýshylardyń quramy da ártúrli.
Petropavlda teatr festıvali osydan 21 jyl buryn ótken eken. Endi mine jańa teatr ǵımaratynda kezdesip otyrmyz. Halyqtyń qabyldaýy jaqsy, keremet kóńil-kúıin, dástúrlerin kórip jatyrmyz.

Bıyl jergilikti ákimdiktiń qoldaýymen barlyq qatysýshylarǵa da jaqsy jaǵdaı jasaldy. Olar burynǵydaı óz spektaklin qoıyp, ketip qalmaı, áriptesteriniń ónerin de tamashalaýǵa múmkindik aldy, - deıdi Q.Qýanyshbaev atyndaǵy memlekettik akademııalyq qazaq mýzykalyq-drama teatrynyń dırektory Aıbolat Jaýdyr.

Teatr festıvaliniń júlde qory da bıyl kóbeıgen. Jeńimpaz ujym bıyl 3 mln teńgemen marapattalady. «Úzdik áıel beınesi», «Úzdik er adam beınesi», «Úzdik kórkemdik sheshim», «Úzdik rejıssýra» sııaqty atalymdardan bólek Temirbek Júrgenov atyndaǵy jáne Soltústik Qazaqstan oblysy ákimdiginiń arnaıy syılyǵy da bolady.