Petropavlda psıhıkalyq derti bar áıel bes kúnnen beri tabylmaı jatyr

PETROPAVL. QazAqparat – Petropavlda Dına Isqaqjanqyzy Áripjanovaǵa izdeý jarııalandy. Derti bar áıel úıinen shyǵyp ketip, qaıta oralmaǵan, dep habarlaıdy QazAqparat tilshisi.

Óńir volonterleri habarsyz ketken 48 jastaǵy Dına Áripjanova jaıynda aqpardy áleýmettik jelide jarııalady. Olardyń aıtýlarynsha, psıhıkalyq derti bar áıel 14 mamyr kúni saǵat 13.00 kezinde Petropavldaǵy M.Jumabaev kóshesindegi úıinen shyǵyp ketken.

Boıy 155 sm, aryqsha kelgen, kók kózdi, qysqa sarǵylt shashty. Sol jaq shekesinde tyrtyǵy bar. Sondaı-aq qarnynda appendıtsıtke jasalǵan otadan qalǵan tyrtyq bolýy tıis.

Úıden sporttyq kostıýmmen shyǵyp ketken.

Áıeldi kórgender, júrgen jerin biletinder 8-926-626-6434, [phone] nemese 102 telefon nómirine habarlasa alady.

Al eki aptadan artyq izdeýde bolǵan Petropavldyń 34 jastaǵy turǵyny Irına Iskakova aman-esen tabylyp, týǵandarymen qaýyshty. Kelinshek 29 sáýir kúni keshkilik úıinen shyǵyp, habarsyz ketken edi.

Buǵan deıin izdeý jarııalanǵan Qyzyljar aýdany Chapaev eldi mekeniniń turǵyny Narıman Nurseıitov áli kúnge tabylǵan joq. 49 jastaǵy er adam 26 naýryz kúni úıinen shyǵyp, Petropavlǵa jol tartqan. Sodan beri habarsyz.