Petropavlda proektsııalyq jaıaý ótkel paıda boldy

PETROPAVL. QazAqparat – Petropavldaǵy kóshelerdiń birinde tsıfrlyq júıeniń kómegimen jaıaý júrginshilerdiń proektsııalyq ótkeli paıda boldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Proektsııalyq jańa júrginshiler ótkeli Petropavldyń QIzatov kóshesinde, «City Mall» saýda ortalyǵyna qarama-qarsy ornatylǵan. Avtomattandyrylǵan tsıfrlyq júıe kesip ótpek bolǵan júrginshilerge joldy jaryqtandyrady. Al aq-sary tústi jaryq kólik júrgizýshilerine 100 metr qashyqtyqtan kórinedi eken.

«Ádette jańbyr, tuman, boran – jol qozǵalysyn qıyndatyp, qaýipti arttyrady. Júrginshiler ótkelderi qysta qar astynda qalyp, durys kórinbeı jatady. Al bul jańashyldyǵymyz aýa raıyna táýelsiz jumys isteıdi deýge bolady. Ony ornatqandaǵy maqsatymyz da jol-kólik oqıǵalaryn azaıtý», - deıdi SQO PD ákimshilik polıtsııa basqarmasynyń bastyǵy Serik Áljanov.

Proektsııalyq jańa júrginshiler ótkeli bul ýchaskege kezdeısoq qoıylmaǵan. 19-20 yqsham aýdandardy bólip jatqan jolda kólik aǵyny kóp. Ári iri saýda ortalyqtary shoǵyrlanǵan.

«Oblys polıtseıleri azamattardyń ótinishteri boıynsha ǵana emes, jol ınfraqurylymyn ońtaılandyrý, jol qozǵalysyn qaýipsizdendirý boıynsha jumystar atqaryp jatyr. Bul pılottyq joba retinde júzege asty. Qazir onyń jumysyna taldaý júrgiziledi, oń nátıjesi bolǵan jaǵdaıda qalanyń basqa ýchaskelerinde, sonyń ishinde jol apattary jıi tirkeletin qaýipti kóshelerde, aýdan ortalyqtarynda ornatý máselesi sheshiledi», - deıdi Serik Áljanov.

SQO joldarynda jyl basynan 236 jol-kólik oqıǵasy tirkelip, saldarynan 34 adam qaza tapty, 304-i jaraqattandy.