Petropavlda polıtseıler esirtki zerthanasy jumysynyń jolyn kesti
Sıntetıkalyq esirtkini óndirý jáne ótkizý faktisi boıynsha sotqa deıingi tergep-tekserý júrgizilýde. Kúdikti – 20 jastaǵy qala turǵyny. Ol mamyr aıynda ustaldy. Jas jigitte ósimdik tektes zat salynǵan 8 polımer túıinshek bolǵan. Taǵy 52 túıinshek pen suıyqtyq quıylǵan eki ydys Haltýrın kóshesi boıyndaǵy turǵylyqty mekenjaıynan tabyldy. Saraptama «spaıs» degen atpen belgili sıntetıkalyq esirtki, sondaı-aq ony daıyndaýǵa arnalǵan prekýrsorlar ekendigin kórsetti.
Kúdiktiniń aıtýynsha, esirtkini ol jeke paıdalaný úshin saqtaǵan. Sonymen qatar, tárkilengen esirtkiniń sany 200 rettik dozaǵa jýyq, esirtki zatynyń jalpy salmaǵy – shamamen 8 gramm, ol asa iri mólsherge jatady.
Onyń úıinen respıratorlar, gramdyq tarazylar, ólsheýish kolbalar men sıntetıkalyq esirtkini daıyndaýǵa arnalǵan basqa da qurylǵylar tárkilendi.
«Qazirgi ýaqytta kúdikti qamaýda. QR Qylmystyq kodeksiniń (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) 297-baby 3-bóligi boıynsha sotqa deıingi tergep-tekserý júrgizilýde. Baptyń sanktsııasy 15 jylǵa deıingi merzimge bas bostandyǵynan aıyrý túrindegi jazany kózdeıdi, – deıdi SQO PD Esirtki qylmysyna qarsy is-qımyl basqarmasynyń bastyǵy Jandos Basybaev.