Petropavlda polıtseıler 99 jastaǵy soǵys ardagerine arnap, aýlada kontsert uıymdastyrdy

PETROPAVL. QazAqparat – Petropavlda 99 jastaǵy Uly Otan soǵysynyń ardageri Grıgorıı Krasılnıkovty Jeńis kúnine oraı Polıtsııa departamenti quttyqtap, maıdangerdiń aýlasynda kontsert uıymdastyrdy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, polıtsııanyń mádenı ortalyq qyzmetkerleri Petropavldyń Bostandyq kóshesindegi 54-shi úıdiń aýlasynda shaǵyn kontsert qoıdy. Osylaısha ofıtserler vedomstvo bastyǵy polıtsııa general-maıory Marat Tólebaevtyń basshylyǵymen 99 jastaǵy ardager Grıgorıı Krasılnıkovti jarqyn mereke – Jeńis kúnimen quttyqtady.

Oblystyq polıtsııa bastyǵy jáne Ardagerler keńesiniń tóraǵasy Aqan Syzdyqov aqsaqalǵa Іshki ister mınıstri polıtsııa general-leıtenanty Erlan Turǵymbaevtyń telegrammasyn tabystady, sondaı-aq uzaq ǵumyr tilep, syılyqtar tabyys etti.

Aýlada ardagerdiń qurmetine uıymdastyrylǵan kontserttik baǵdarlamany tamashalaýǵa kórshiler de jınaldy. Kórermender polıtseılerdi qoshemettep qarsy aldy. Ártister otty jyldary aıtylǵan «Týchı v golýbom», «Zdes ptıtsy ne poıýt», «Smýglıanka», «Den Pobedy» sııaqty ánderdi shyrqady. Búldirshinder ardagermen sýretke tústi.

Grıgorıı Krasılnıkov áskerge 1940 jyly Sverdlovsk oblysynan shaqyrtylǵan. Soǵysqa basynan aıaǵyna deıin 1940-1945 jyldary qatysqan. Jaıaý áskerde jáne áýe polkiniń qatarynda bolǵan. Shyǵys Polshada aerodromdy atqylaǵan kezde aýyr jaraqat alǵan.

Gvardııanyń aǵa serjanty Krasılnıkov 1945 jyldyń 9 mamyryn gospıtalda qarsy alady. Úıine qarasha aıynda oraldy. 1948 jyly óz qalaýymen KSRO ІІM Sverdlovsk mektebine oqýǵa túsedi. Oqýdan keıin Soltústik Qazaqstan oblysyna jiberiledi. Shırek ǵasyr ómirin qylmystyq-atqarý júıesindegi jedel qyzmetke arnady. Ol basqarǵan kolonııa tyń qurylysyna qatysqan. Zeınetke 48 jasynda shyqqanymen, 80 jasqa deıin jumys istedi. Aýdan ortalyǵy Sergeevkada volonterlerdiń jasaǵyn basqaryp, jas qyzmetkerlermen tájirıbe bólisti.

SQO ishki ister organdarynda 700-den astam maıdanger eńbek etken. Ekinshi dúnıejúzilik soǵystaǵy jeńistiń 76 jyldyǵyn olardyń tek ekeýi Grıgorıı Krasılnıkov pen Nıkıta Semenov qarsy alady. 10 mamyr kúni polıtsııa general-maıory Marat Tólebaev Nıkıta Gerasımovıchke de baryp, 101-shi týǵan kúnimen quttyqtaıdy.