Petropavlda polıtseı-boıjetken qazaq tilinen ótken baıqaýda jeńimpaz atandy
Soltústik Qazaqstan oblysy polıtsııa departamenti baspasóz qyzmetiniń málimetinshe, Serafıma Okısheva Petropavl qalalyq polıtsııa basqarmasynyń arnaıy qabyldaý bólimshesinde jumys isteıdi. Qazaq tilin mektepte júrip tereń meńgere bastaǵan. Búginde sonyń nátıjesin kórip otyr. Esh qıyndyqsyz is qaǵazdaryn memlekettik tilde júrgizedi.
SQO ákimdigi janyndaǵy Tilderdi oqytý ortalyǵy uıymdastyrǵan onlaın-baıqaý Jambyldyń 175 jyldyǵyna oraı uıymdastyryldy. Serafıma Okısheva baıqaýǵa aqyn-jyraýdyń «Lenıngradtyq órenim» óleńin naqyshyna keltire oqyp, beınerolık jiberdi.
«Lenıngradtyq órenim» óleńi Jambyldy búkil Keńes Odaǵyna tanytty. Blokadany basynan ótkergen batyrlardyń urpaqtary áli kúnge deıin «Qart Jambyldyń» rýhty óleń joldaryn jatqa biledi. Qurmet tutady. Men de aqynnyń bul óleńin súıip oqımyn. Baıqaýǵa oraı «Lenıngradtyq órenim» óleńin Petropavldaǵy Jambyldyń eskertkishiniń janynda oqydym. Beınerolıkti sondaı-aq Uly Otan soǵysyna qatysqan soltústikqazaqstandyq tártip saqshylaryna arnalǵan oblystyq polıtsııa mýzeıindegi jádigerler janynda túsirdik», - deıdi Serafıma.
Ádilqazylar Serafımanyń til tazalyǵyn, mánerlep oqýyn joǵary baǵalady. Beınerolık qala sheginde, aqynnyń eskertkishi men túsirildi.
SQO PD bastyǵy polıtsııa polkovnıgi Marat Tólebaevtyń aıtýynsha, jeke quramnyń memlekettik tildi meńgerýge degen umtylysy oblystyq polıtsııa vedomstvosynda jan-jaqty qoldaý tabady. Qyzmetkerlerge arnalǵan sabaqtar turaqty ótkiziledi. Іshki jáne syrtqy kommýnıkatsııalar bólimi qazaq tilin nasıhattaýǵa baǵyttalǵan is-sharalardy uıymdastyrady.