Petropavlda para alǵan vetınspektorǵa 5 mln teńgeden astam aıyppul salyndy
SQO sybaılas jemqorlyqqa qarsy qyzmettiń málimetinshe, Petropavl qalalyq aýmaqtyq ınspektsııasynyń bas mamany Janarbek Býsýrmanovqa qatysty qylmystyq is boıynsha mán-jaılar, burynǵy memlekettik qyzmetshi jumys istegen ujymda qaraldy.
Petropavl qalalyq sotynyń úkimimen bas maman – memlekettik veterınarııalyq-sanıtarııalyq ınspektor para alǵany úshin sottalyp, oǵan paranyń 35 eselengen somasy mólsherinde aıyppul túrinde jaza taǵaıyndaldy.
«2023 jyldyń aqpan-naýryz aılary aralyǵynda Býsýrmanov qyzmettik jaǵdaıyn júıeli negizde paıdalana otyryp, tıisti ilespe veterınarııalyq qujattarsyz «Prıvokzalnyı» jáne «Darııa» qalalyq bazarlarynda et ónimderin kóterme satyp alýdy jáne bólshektep satýdy júzege asyratyn kásipkerlerden para alǵan.
Sottalýshynyń mundaı áreketi aýmaqtyq ınspektsııanyń jaýapty tulǵalary tarapynan tıisti baqylaýdyń bolmaýynan týǵan», - deıdi QR Sybaılas jemqorlyqqa qarsy is-qımyl agenttiginiń SQO boıynsha departamenti basshysynyń birinshi orynbasary Aıdos Júnisov.
Baǵynyshtylardyń jemqorlyǵy úshin birinshi basshylardyń jaýapkershiligi týraly zańnama normalaryn iske asyrý maqsatynda Veterınarııalyq baqylaý jáne qadaǵalaý komıteti tóraǵasynyń sheshimimen Petropavl qalalyq aýmaqtyq ınspektsııasynyń basshysy Aqpan Qusaıynov qatań sógis aldy.
«Inspektorlar arasynda sybaılas jemqorlyqqa jol bermeý úshin olardyń jumysynda qyzmettik aýdıo jáne beıne tirkeý paıdalanylýy kerek. Mundaı talaptyń bolýyna qaramastan, Petropavldyń 7 bazarynda barlyq 5 ınspektordy beınetirkegishtermen jaraqtandyrý tek usyný qaralǵannan keıin ǵana qolǵa alyndy.
Sybaılas jemqorlyq qylmys jasaýǵa yqpal etetin mán-jaılardy joıý úshin aýmaqtyq ınspektsııa basshylyǵy memlekettik ınspektorlardyń sybaılas jemqorlyqqa qarsy zańnama talaptaryn jáne memlekettik qyzmetshilerdiń Ádep kodeksi normalaryn saqtaýyna qatysty memlekettik veterınarııalyq-sanıtarııalyq baqylaý jáne qadaǵalaý aıasynda júrgizilgen beınejazbalarǵa monıtorıng júrgizýi qajet», - deıdi Aıdos Júnisov.