Petropavlda oıyn alańynda júrgen balanyń aıaǵyn armatýra tesip ótti

PETROPAVL. QazAqparat – Petropavldaǵy kópqabatty úılerdiń biriniń aýlasynda 7 jasar bala jaraqat aldy. Ol oınap júrip shyǵyp turǵan armatýrany basyp ketken, dep habarlaıdy QazAqparat tilshisi.

Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, oqıǵa Petropavldaǵy Jambyl Jabaev kóshesindegi kópqabatty úılerdiń biriniń aýlasynda bolǵan. Keshqurym oıyn alańynda júrgen 7 jasar bala jerde ushy shyǵyp turǵan armatýrany baıqamaı basyp ketken. Jan daýsy shyqqan balaǵa birden jedel járdem qyzmeti shaqyryldy. Alaıda olarǵa qutqarýshylardyń kómegi qajet boldy.

«Biz oqıǵa ornyna jedel jettik. Bala qatty qoryqqan, eseńgirep qalypty. Ata-anasymen birge ony aldandyryp, iske kiristik. Metall shybyqty kesý úshin gıdrokeskishti qoldanýǵa týra keldi. Balany temirden bosatyp, jedel járdem brıgadasyna tapsyrdyq», - deıdi qutqarý bólimshesiniń jetekshisi Aǵybaı Nurǵýjınov.

Armatýra balanyń eti men sińirlerine zaqym keltirmegen, operatsııa sátti ótti.

«Bizdiń jumysymyzda túrli jaǵdaılar bolyp turady. Saýsaqtan saqına sheshý, shatyrdan nemese kópqabatty úılerdiń joǵarǵy qabattarynan terezelerge túsip, páterlerdi ashý, apattardan zardap shekkenderdi avtokólikterinen shyǵarý. Ótken jyldyń kúzinde aıaǵyn aǵashtyń jaryǵyna tyǵyp, qysylyp qalǵan 10 jasar balaǵa kómektestik», - deıdi Aǵybaı Nurǵýjınov.

SQO qutqarýshylary jyl basynan beri 160 shaqyrtýǵa baryp, 70 adamdy qutqardy.