Petropavlda órt sóndirýshilerge arnalǵan mýral paıda boldy
Petropavldaǵy kóp qabatty úılerdiń biriniń qabyrǵasynda órt sóndirýshilerdiń beınesi bar mýral paıda boldy. Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, asa úlken sýretti kókshetaýlyq sýretshi-dızaınerler Aldııar Jákeev pen Maǵjan Aıtqojev salyp shyqty.
«Birneshe saǵat boıy bıiktikte, jeldiń óti men kúzgi jaýyn-shashynnyń astynda turyp olar Qazaqstannyń órt sóndirýshilerine arnalǵan mýraldy salyp shyqty. Ideıamyzdy oıdaǵydaı júzege asyrdy, sýret kóńilden shyqty. Órt sóndirýshiniń batyl júzi alystan menmundalap, Nursultan Nazarbaev kóshesine shyqqan ár adamnyń kózine birden túsedi», - deıdi órtke qarsy qyzmet ardageri Erik Májıtov.
Bul jobanyń bastamashylary - azamattyq qorǵaý organdarynyń qyzmetkerleri men ardagerleri.
Osy salada 30 jylǵa jýyq eńbek ótili bar Erik Májıtovtiń aıtýynsha, órt sóndirýshilerdiń qurmetine arnalǵan belgi qaldyrý ıdeıasy burynnan bolǵan. Jambyl oblysyndaǵy áskerı bólimde bolǵan órt, birneshe mamannyń qaza tabýy bul isti júzege asyrýǵa túrtki bolǵan.
«Bizge tańdaýǵa 6 eskız berildi. Keıin mýraldy salýǵa oryn izdedik. Bizge bes qabatty ǵımarattar berildi, biraq odan sýret durys kórinbeıtin boldy. Nátıjesinde tańdaý 19 yqsham aýdandaǵy 9 qabatty ǵımaratqa tústi. Ornalasqan jeri yńǵaıly, ári qasynda meshit pen shirkeý bar», - deıdi Erik Májıtov.
Mýraldyń tómengi jaǵyna QR-kody bar taqtaısha ornatý josparlanǵan. Ol arqyly smartfon ıeleri QR tótenshe jaǵdaılar mınıstrligi týraly, tarıhy men vedomstvo jumysy jaıynda bile alady.