Petropavlda ońaı olja tappaq bolǵan jigit 1 mln teńgege jýyq qarajatynan aıyryldy

PETROPAVL. QazAqparat – Petropavldyń turǵyny jyldam tabys tabýdy ýáde etken alaıaqtarǵa 1 mıllıon teńgege jýyq aqshasyn berip qoıdy. Ol munaı kompanııasyna ınvestıtsııa saldym dep oılaǵan, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, jyl basynan beri 10-nan astam soltústikqazaqstandyq ınternette «jyldam tabys tabýdy» ýáde etken alaıaqtardyń qurbany boldy. Solardyń biri – 21 jastaǵy Petropavl turǵyny. Ol basqalarǵa eskertý maqsatynda óz oqıǵasymen bólisti.

Jigittiń aıtýynsha, ol YouTube beınehostınginde jalǵan jarnamalar kezdesetinin kútpegen. Sondyqtan, iri munaı kompanııalarynyń biriniń bırjada aqsha tabýǵa ýáde beremiz degen beınerolıgine senip qalǵan.

Alaıaqtar oǵan «bırjalyq qosymshany» júkteý úshin WhatsApp messendjeri arqyly silteme jibergen. «Treıderlermen» baılanys Skype arqyly júzege asyrylǵan, qońyraýlar birde qazaqstandyq, birde brıtandyq nómirlerden kelip túsken.

Іri oljaǵa keneletinine sengen jigit uzaq ýaqyt boıy óziniń 700 myń teńgesin jáne nesıege alǵan 250 myń teńgeni «ınvestıtsııaǵa salǵan».

Birde alaıaqtar petropavldyqtan taǵy bir nesıe alyp, «bırjalyq oıynǵa mıllıon teńge salýdy» talap etken. Sodan keıin jas jigit ınternetten osy bırja týraly jurttyń pikirin izdep, jelidegi alaıaqtardyń quryǵyna túskenin túsingen. Opyq jegen jigit óz basynan ótken jaǵdaıǵa tap bolmaý úshin, ınternettegi kez kelgen aqparatty tekserýge keńes beredi.

SQO PD Krımınaldyq polıtsııa basqarmasynyń bastyǵy Marat Jumalıevtiń aıtýynsha, alaıaqtardyń aıla-áreketteri ár túrli bolýy múmkin, biraq eger «jeńil aqsha» ýáde etilse, qandaı da bir óte tıimdi «aktsııalarǵa», «júldelerdiń utys oıyndaryna» qatysý jáne t.b., tipti mundaı jarnamalar tanymal brendterdiń belgisimen birge júrse de, árqashan saq bolý kerek. Resmı resýrstardaǵy aktsııalar týraly aqparatty mindetti túrde teksergen jón.