Petropavlda «Nur Otan» partııasynyń saılaýaldy baǵdarlamasy bekitildi

PETROPAVL. QazAqparat – Petropavl qalasynyń máslıhatyna «Nur Otan» partııasynyń tiziminen áıelderdiń 30%-y jáne jastardyń 30%-y kirdi, dep habarlaıdy QazAqparat tilshisi.

«Nur Otan» partııasy Soltústik Qazaqstan oblystyq fılıaly baspasóz qyzmetiniń málimetinshe, partııanyń Petropavl qalalyq fılıaly konferentsııasynyń 94 delegaty partııalyq tizimge daýys berdi. Sondaı-aq, oblys ortalyǵy boıynsha partııanyń saılaýaldy baǵdarlamasy bekitildi.

Petropavl qalalyq máslıhattyń partııalyq tizimine 27 nurotandyq endi, olardyń 30% - áıelder jáne 30% - jastar. Ókilderdiń ortasha jasy – 44. Aralarynda shaǵyn jáne orta bıznes, bilim berý, densaýlyq saqtaý, sport, ónerkásip, kvazımemlekettik sektor salalarynyń ókilderi bar. Tizim 1 orynǵa 2 adam qaǵıdaty boıynsha qalyptastyryldy.

Jalpy oblys ortalyǵy boıynsha praımerızge barlyǵy 106 adam qatysty. Olar saılaýshylarmen 700-den astam kezdesý ótkizdi, nátıjesinde 60-tan astam usynys jınaldy. Olardyń 30-y Petropavl qalasy boıynsha «Nur Otan» saılaýaldy baǵdarlamasyna engizildi.

«Oblys ortalyǵyn damytýdyń 7 basym baǵyty bolady. Saılaýaldy baǵdarlamada aldaǵy 5 jylǵa arnalǵan negizgi maqsattar men mindetter, sondaı-aq Petropavldyń negizgi problemalyq máselelerin sheshý joldary qamtylǵan. Baǵdarlamany iske asyrý ornyqty ekonomıkalyq damýǵa qol jetkizýge jáne halyqtyń ómir súrý sapasyn arttyrýǵa múmkindik beredi», - dedi «Nur Otan» partııasy Petropavl qalalyq fılıalynyń tóraǵasy Bolat Jumabekov.

Konferentsııa barysynda oblystyq máslıhattyń partııalyq tizimine qosylýǵa 12 úmitker baq synasty. Pikirtalas barysynda olar turǵyn úıdiń qoljetimdiligi, joldardy jóndeý, halyqty áleýmettik qoldaý, sondaı-aq densaýlyq saqtaý, bilim berý jáne turǵyn úı-kommýnaldyq sharýashylyq deńgeıin arttyrý máselelerin kóterdi.

Daýys berý qorytyndysy boıynsha Petropavl qalasynan 9 adam oblys máslıhatyna «Nur Otan» partııasynyń tizimine engizildi. Sonymen qatar, aımaqtyq konferentsııaǵa delegattar saılandy.

10-12 qarasha aralyǵynda SQO-da partııanyń 14 aýmaqtyq fılıalynda konferentsııalar ótti, onda jergilikti máslıhattarǵa partııalyq tizimder anyqtaldy. Buǵan deıin 7 jáne 8 qarashada oblys boıynsha 246 bastaýysh partııa uıymdarynda jınalystar ótti.

Qalalyq jáne aýdandyq pikirsaıystardyń jeńimpazdary 17 qarashaǵa josparlanǵan oblystyq konferentsııadaǵy pikirsaıystarǵa qatysady. Óńirlik konferentsııanyń qorytyndysy boıynsha SQO-dan QR Parlament Májilisi saılaýyna «Nur Otan» partııasynyń tizimine enetin praımerız kandıdattary anyqtalady.