Petropavlda myltyq ustap júrgen er adam qolǵa tústi

PETROPAVL. QazAqparat – Petropavl polıtseıleri saıajaı qaýymdastyqtarynyń birinde myltyqpen júrgen er adamdy anyqtap, ustady. Oqıǵa ornynan qashyp ketpek bolǵan ol endi tirkelmegen qarýdy ustaǵany úshin jazaǵa tartylmaq, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, qoǵamdyq tártipti qadaǵalap júrgen Petropavldyń patrýldik polıtsııa batalonynyń qyzmetkerleri saıajaı qaýymdastyǵynyń aýmaǵynda eki er adamdy baıqaıdy. Olardyń bireýi polıtseılerdi kóre sala qalyń qarǵa qolyndaǵy zatty laqtyryp, boı tasalamaq bolǵan. Tártip saqshylary omby qardan bir uńǵyly «IJ-K» ańshy myltyǵy men 16 kalıbrli 5 patron salynǵan qara paketti tapty.

Qolyndaǵysynan qutylmaq bolǵan er adamnyń kim ekeni anyqtaldy. Ol 30 jastaǵy Petropavl turǵyny bolyp shyqty. Jigittiń aıtýynsha, myltyqty birer kún buryn buta arasynan taýyp alǵan.

Tirkelmegen qarýdy alyp júrgeni úshin oǵan qatysty materıal jınaldy, keıin sotqa jiberiledi. Tekserý júrgizilýde.

«Qarýdy zańsyz qoldaný úshin jaýapkershilik baryn eske salamyz. Jazaǵa tartylmaýdyń jalǵyz joly - tirkelmegen qarý-jaraqty óz erkimen tapsyrý. Al eger qarý sııaqty basqa da qaýipti zattardy anyqtaǵan jaǵdaıda, olardyń tabylǵany týraly dereý polıtsııaǵa habarlaý qajet», - deıdi SQO PD ákimshilik polıtsııa basqarmasynyń bastyǵy Serik Áljanov.

Polıtseıler aıtyp ótkendeı, tirkelmegen qarýy barlar ony kóbinese qarapaıym qaýipsizdik erejelerin ustanbaı saqtaıdy. Bul jazataıym oqıǵaǵa sebep bolýy nemese qylmystyq maqsatta urlanýy múmkin. Buǵan jol bermeý úshin tártip saqshylary qarýdy zańsyz saqtaý faktilerin anyqtaý boıynsha únemi reıd ótkizedi.

Ótken jyly zańsyz aınalymnan 128 k tirkelmegen qarý tárkilenip alyndy.

Foto: polisia.kz