Petropavlda meıramhana birneshe toı ótkizgen

PETROPAVL. QazAqparat – Petropavlda ótken jeksenbide 70-ten 150-ge deıin qonaq shaqyryp toı ótkizgender anyqtaldy. Endi uıymdastyrýshylar da, toıhana ıesi de ákimshilik jazaǵa tartylýy múmkin, dep habarlaıdy QazAqparat tilshisi.

Soltústik Qazaqstan oblysy polıtsııa departamentiniń málimetinshe, óńirde shekteý sharalaryna qaramastan toı uıymdastyrýshylar tyıylmaı otyr. Petropavlda jáne oblys aýdandarynda mobıldi monıtorıng toptary demalys kúnderi reıdterge shyǵyp keledi. Nátıjesiz de emes.

Ótken aptada, 16-22 tamyz aralyǵynda SQO aýmaǵynda sanıtarııalyq normalardy buzýdyń 24 deregi anyqtaldy. Olardyń ár faktisi boıynsha «Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» baby boıynsha materıal jınaldy.

Bas sanıtar dárigerdiń talaptaryn óreskel buzý deregin jeksenbi kúni Petropavl qalalyq monıtorıng toby anyqtady. Oblys ortalyǵyndaǵy meıramhanalardyń birinde zeınet demalysyna shyǵaryp salý toıy jáne birneshe otbasylyq mereke uıymdastyrylǵan. Árqaısysynda dastarhan basynda 70-ten 150-ge deıin qonaq bolǵan. Nátıjesinde uıymdastyrýshylar men toıhana ákimshiligine qatysty materıal jınaldy.

SQO-da jyl basynan shekteý sharalaryn buzýdyń myńnan astam deregi anyqtaldy. Qaýipti indettiń taralýyna jol bermeý maqsatynda aldyn alý jumystary kún saıyn ótkizilip keledi.

Jergilikti atqarýshy organdardyń qyzmetkerleri, dárigerler jáne tártip saqshylary qaýipti ınfektsııany taratpaý boıynsha usynymdar men talaptardy qatań saqtaýǵa shaqyrady.