Petropavlda mektep oqýshysy halyqaralyq jastar baıqaýynyń júldegeri atandy
Aısana Qusaıynova Petropavldaǵy Nazarbaev Zııatkerlik mektebiniń oqýshysy. Ol halyqaralyq baıqaýǵa óziniń ǵylymı-fantastıkalyq jumysyn esse túrinde usynǵan. Jastardyń arasynda uıymdastyrylǵan konkýrs oqýshynyń qyzyǵýshylyǵyn týdyrdy. Óıtkeni Aısana úshin ǵylymı fantastıka súıip oqıtyn janr. Ózi de qazir qııal-ǵajaıypqa toly oqıǵalar jaıynda qalam terbep júr. Sol sebepti birden saıtta tirkelip, qatysýǵa ótinish joldaǵan.
«Men bul baıqaý jaıynda áleýmettik jelide bilip, qatysýǵa bel býdym. Negizi esseni pandemııa kezinde jazǵan edim. Óıtkeni koronavırýs búkil álemde úlken problemaǵa aınaldy. Men atalǵan máseleni barsha adamzatqa jetkizip, bundaı jaǵdaılarda birliktiń qanshalyqty mańyzdy ekenin kórsetkim keldi», - deıdi Aısana Qusaıynova.
Oqýshy essesin dárigerdiń kúndelik jazbasy túrinde usyndy. Onda mamannyń naýqastarymen jalǵyz qalǵan kúnderinen úzindiler jazylǵan. Sondaı-aq, syrqattardyń kóbeıýine baılanysty medıtsınalyq qyzmetkerlerdiń jetispeýshiliginen olardyń aýyr jumysy sıpattalady. Shyǵarma jelisi boıynsha nátıjesinde birneshe eldiń 9 dárigeri birlesip, vaktsına oılap taýyp, vırýsty jeńip shyqqan. Aısananyń essesi barlyq tekseristerden sátti ótip, ol «Jarqyn start» nomınatsııasy boıynsha júldeger atandy.
Aıta keteıik, «Gorızont-2100» ǵylymı, ǵylymı-praktıkalyq jáne ǵylymı-fantastıkalyq jumystardyń halyqaralyq jastar baıqaýy 2019 jyldan beri ótkizilip keledi. Osy ýaqytta is-sharaǵa álemniń 55 elinen 16 men 26 jas aralyǵyndaǵy myńnan astam jas qatysqan. 2022 jyly konkýrsqa 400-den astam jumys joldanǵan, onyń ishinde 10-y - qazaqstandyqtardyń jumysy.
Aısana men taǵy eki otandasymyz júldeger atandy. Endi olar aqpan aıynda Máskeýde ótetin «Álem 2100: jahandyq trendter jáne bolashaq jastardyń kózimen» halyqaralyq jastar forýmyna barady.
Foto: Petropavl qalasy NIS baspasóz qyzmeti