Petropavlda mektep-balabaqshalardyń qaýipsizdik júıesi kúsheıtilip jatyr

PETROPAVL. QazAqparat – Petropavl ákimi Rýslan Ańbaev qala turǵyndarymen kezdesý barysynda mektep-balabaqshalardyń qaýipsizdigi úshin qandaı sharalar qolǵa alynǵanyn aıtty, dep habarlaıdy QazAqparat tilshisi.

Petropavl ákimi Rýslan Ańbaevtyń aıtýynsha, aqpan aıynda №4 orta mektepte bolǵan oqıǵadan keıin bilim berý mekemelerindegi qaýipsizdik kúsheıtilip jatyr.

Qazirgi ýaqytta barlyq mektep-balabaqshada beınebaqylaý bar, oblys ortalyǵyndaǵy 38 mektep pen 36 balabaqsha polıtsııanyń jedel basqarý ortalyǵyna qosylǵan.

«Budan basqa «dabyl túımesi», órt bola qalǵan jaǵdaıda avtomatty túrde habarlandyratyn júıe qoıyldy. 23 mektepte týrnıket istep tur.

Bıyl taǵy 7 mektepke týrnıket ornatýǵa 53 mln teńge bóldik. Qol metall detektorlary alynyp jatyr. Qazir ol 23 mektepte bar. Al Petropavldyń 35 mektebine táýlik boıy mamandandyrylǵan kúzet qyzmetin engizýge 158 mln teńge, balabaqshalarǵa 61,6 mln teńge jumsalady», - dedi Petropavl ákimi.

Jalpy bıyl Petropavldyń bilim salasynyń bıýdjeti - 25,6 mlrd teńge.

Buǵan deıin oblys ortalyǵynda 21 mlrd teńgege zamanaýı 4 mekteptiń qurylysy júrgiziletinin aıtqan edik. Bilim ordasy «Jaıly mektep» baǵdarlamasy aıasynda salynbaq.

Al jańa oqý jylynan bastap óńirde bastaýysh synyp oqýshylary úshin túski as tegin bolady. Soltústik Qazaqstan oblysynyń ákimi Aıdarbek Saparov Petropavl men barlyq aýdandardyń oqýshylary tegin tamaqtanatynyn jetkizdi.