Petropavlda mańaıyn taza ustamaǵan 49 kásipker jazalandy

PETROPAVL. QazAqparat – Soltústik Qazaqstan oblysynda polıtseıler jyl basynan abattandyrý erejelerin buzýdyń 4 myńnan astam deregin anyqtady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, jergilikti polıtsııa qyzmetiniń bir mindeti - abattandyrý erejeleriniń saqtalýyn qadaǵalaý. Ýchaskelik ınspektorlar bul jumysty oblys ortalyǵynda da, aýyldy jerlerde de júrgizedi.

Petropavlda ǵımaratynyń qasbeti men irgeles aýmaqty durys ustamaǵany, qoqysty ýaqtyly shyǵarmaǵany úshin 49 kásipker jaýapkershilikke tartyldy. Olarǵa qatysty QR Ákimshilik quqyq buzýshylyq týraly Kodeksiniń 505-baby «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý» boıynsha hattamalar toltyryldy.

Polıtseılerdiń aıtýynsha, baptyń sanktsııasy eskertý jasaýdy nemese jeke tulǵalarǵa – 20, shaǵyn kásipkerlik sýbektilerine nemese kommertsııalyq emes uıymdarǵa – 30, orta kásipkerlik sýbektilerine – 40, iri kásipkerlik sýbektilerine 100 AEK mólsherinde aıyppul salýdy kózdeıdi.

«Júrgizilip jatqan jumystardyń maqsaty – eldi mekenderdiń sanıtarlyq jaǵdaıyn jaqsartý jáne kelbetin saqtaý. Jyl basynan polıtseıler oblys boıynsha abattandyrý erejelerin buzýdyń 4390 deregin anyqtady, onyń 565-i sáýir aıynda», - deıdi SQO PD jergilikti polıtsııa qyzmeti basqarmasy bastyǵynyń orynbasary Aleksandr Rozbah.