Petropavlda mamandar kópir qurylysyna nelikten karton qoldanǵanyn túsindirdi
Petropavl men Jumysshy kentin qosatyn negizgi kópirlerdiń biri eki aptadan beri jóndelip jatyr. ıAǵnı kópir 28 qazannan beri avtomobıl qozǵalysyna jabyq. Qalanyń ortalyǵyna kúnde qatynaıtyn turǵyndarǵa bul biraz qıyndyq ákeldi. Mamandardyń aıtýynsha, kópir 2014 jyly kúrdeli jóndelgen, osy maqsatqa 500 mln teńge jumsalǵan. Ýaqyt óte joldyń beton plıtalary sógilgen. Ony ortasha jóndeýge 21 mln teńge bólindi.
«Jumystar aıaqtalýǵa jaqyn. 5 sm asfalt-beton qosyndysyn tósedik. Endi beton plıtalarynyń arasy qaıta ashylyp, jezden jasalǵan kompensator qoıylady. Keıin ústine taǵy da asfalt tóseledi. Bul tehnologııa kóptegen elderde qoldanylady. Olaı etpegen jaǵdaıda eki betonnyń qosyndysy túzý bolmaı, tolqyndanyp turady», - deıdi joba avtory Sergeı Chýrılov.
Jaqynda áleýmettik jelide kópirdiń qurylysyna qatysty beınejazba paıda boldy. Qurylysshylar nysandy jóndeý barysynda karton qaǵazdy, taqtaılardy qoldanǵan. Bul ádis kópshiliktiń synyna qalyp, ájýaǵa aınaldy.
«Ol karton, eski-qusqyny tesiketrdi jabý úshin ýaqytsha qoldandyq. Óıtkeni kópirdiń astynan temirjol ótedi. Qurylys materıaly temirjolǵa túsip, qaýip týdyrýy múmkin», - deıdi Sergeı Chýrılov.
Petropavl qalalyq ákimdik ókilderiniń aıtýynsha, kópirdegi jóndeý jumystary bir aptanyń ishinde aıaqtalmaq.
«Kópirge jóndeý júrgizý úshin jaz ýaqytynda eki ret konkýrs ótkizdik, nátıje bolmady. Sondyqtan qyrkúıek aıynda «Magıstral-SK» JShS kelisimshartqa otyryp, Ońtústik-Oral temirjolymen tıisti kelisim jasalǵannan keıin jumystar bastaldy. Kelesi aptada kópir paıdalanýǵa beriledi», - deıdi Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń baspasóz hatshysy Ásem Aıtýlova.