Petropavlda Maǵjan Jumabaevtyń kózi tirisinde jaryq kórgen kitaby kórmege qoıyldy

PETROPAVL. QazAqparat - Soltústik Qazaqstandaǵy arnaıy jármeńkede «Rýhanı jańǵyrý» baǵdarlamasynyń qalaı júzege asyrylyp jatqany kórsetildi, dep habarlaıdy «QazAqparat» HAA tilshisi.

Kórmege oblystaǵy barlyq aýdannan eksponattar qoıyldy. Olardyń arasynda tarıhı qujattar, halyq shyǵarmashylyǵy buıymdary, kıeli mekenderdiń maketteri, t.b. boldy. Sondaı-aq kórme aıasynda qumyra jasaý jáne saz ıleý óneri boıynsha sheberlik sabaqtary ótkizildi.

«Árbir aýdan qaı baǵytta jumys istep jatqanyn kórsetedi. «Rýhanı jańǵyrý» baǵdarlamasy tarıhı qundylyqtar men ulttyq kodty saqtap qalýǵa baǵyttalǵan. Ár aýdan derbes joba ázirlep, aýqymdy jumystar atqardy. Kórmede ol kórsetildi de. Munda balalardyń óner týyndylary da, qoldanbaly óner úlgileri de, tarıhı qujattar da bar», - deıdi «Abylaıhannyń rezıdentsııasy» mýzeı kesheni dırektorynyń orynbasary Ásemgúl Qydbekova.

M. Jumabaev aýdany «Rýhanı jańǵyrý» jobalyq keńsesiniń basshysy Serik Jumaǵulov jergilikti mýzeıde Maǵjan Jumabaevtyń kózi tirisinde jaryq kórgen kitaby da bar ekenin aıtty.

«Bul bizdiń aýdandaǵy aqynnyń jalǵyz kitaby. Ol tóńkeriske deıin arab jazýymen basyp shyǵarylǵan. Maǵjan Jumabaevtyń 1924 jyly shyqqan «Pedagogıka» kitabynyń dızaınerlik kóshirmesi bar. Onyń túpnusqasy Túrkistanda saqtaýly. Taǵy bir tamasha eksponatymyz bar, ol - aqyn Maǵjannyń latyn grafıkasymen jazylyp, Túrkııada baspa betin kórgen kitaby», - deıdi Serik Jumaǵulov.

Aýdandyq mýzeıden aýyl adamdarynyń latyn grafıkasymen jazylǵan qujattary da tabylǵan. Olar da kórmege qoıyldy.

Eske sala ketsek, tamyz aıynda oblystyq kórmede Maǵjan Jumabaevtyń buryn qupııa bolǵan qoljazbalary da jurtshylyqqa usynylǵan bolatyn.