Petropavlda qujatsyz kólik aıdap, polıtsııadan qashqan jas jigit vıdeoǵa túsip qaldy

PETROPAVL. QazAqparat – Petropavlda 26 jastaǵy jigit júrgizýshi kýáliginsiz rýlge otyryp, keıin artynan qýǵan polıtseılerden qashyp qutylmaq boldy, dep habarlaıdy QazAqparat tilshisi.

Búgin áleýmettik jelide polıtsııadan qashyp, kóshemen júıtkigen kóliktiń beınejazbasy tarady.

Kýágerlerdiń aıtýynsha, oqıǵa Petropavldaǵy Volochaevskıı kóshesinde saǵat 10.00 shamasynda bolǵan.

Osy oqıǵaǵa qatysty Soltústik Qazaqstan oblystyq polıtsııa departamenti túsinik berdi.

«19 mamyr kúni Petropavl qalalyq polıtsııa basqarmasy patrýldi polıtsııa batalony avtopatrýl qyzmetkerleriniń nazaryn Audi A6 avtokóligi aýdarǵan. Kólik júrgizýshisi kóshede mashına terezesin ashyp, mýzykany qatty qoıǵan. Tártip saqshylary onyń qujattaryn teksermek maqsatta toqtatpaq bolady, alaıda, kólik júrgizýshisi zańdy talapqa baǵynbaı, jeke sektorda qashyp qutylmaq bolǵan. Ol Koshýkov-Haltýrın qıylysynda ustaldy. Rýlde júrgizýshi kýáligi joq 26 jastaǵy qala turǵyny boldy», - delingen habarlamada.

Osy derek boıynsha zań buzýshyǵa «Qujattary joq jáne basqarý quqyǵy joq adamnyń kólik quralyn basqarýy» baby boıynsha ákimshilik hattama toltyryldy.

Avtokólik arnaıy turaqqa qoıyldy.

SQO polıtseıleri 15 mamyrdan bastap óńirde respýblıkalyq «Nazar aýdaryńyz, balalar!» jáne oblystyq «Mas júrgizýshi» jedel-aldyn alý sharasy ótip jatqanyn eske salady.