Petropavlda quny 5,3 mlrd teńge bolatyn kópir salynyp jatyr

<p>PETROPAVL. KAZINFORM &ndash; Petropavlda oblys ortalyǵy men Jumysshy kentin qosatyn jańa kópir salynyp jatyr. Jospar boıynsha temirjoldyń ústi arqyly ótetin bul ótkel kelesi jyly paıdalanýǵa berilmek.</p>

Soltústik Qazaqstan oblysy ákimi baspasóz qyzmetiniń málimetinshe, jobany júzege asyrý kólik aǵynyn basqa baǵytpen jiberip, Jumysshy kentindegi qazirgi jol ótkelindegi kólik aǵynyn azaıtýǵa jáne qajet bolǵan jaǵdaıda turǵyndarǵa qolaısyzdyq týǵyzbaı, jóndeý jumystaryn júrgizýge múmkindik beredi. 

«Kópir qurylysyna bıýdjetten 5,3 mlrd teńge qarastyrylǵan, onyń 80% merdigerge berildi. Jyl sońyna deıin kópir men kireberis joldardy, sońǵy jáne aralyq tirekterdi, aralyq qurylymdy salýdy, monolıtti jabyn plıtasyn ornatýdy jáne ınjenerlik jelilerdi aýystyrýdy aıaqtaýy kerek. Kelesi jylǵa asfalt-beton jamylǵysyn tóseý qalady. Merdigerge jáne tıisti basshylarǵa qurylys kestesin qatań saqtap, barlyq jumystardy merziminde aıaqtaýdy tapsyrdym», - dep jazdy SQO ákimi Ǵaýez Nurmuhambetov áleýmettik jelidegi paraqshasynda. 

Sondaı-aq, SQO ákimi Petropavl qalasyndaǵy aýlalardy retke keltirý jumystarynyń barysyn tekserdi. Oblys ortalyǵyndaǵy 596 aýlanyń 254-i jańartýdy qajet etedi.

«Bıyl 60 aýla jónge keltiriledi. Ár aýlada oıyn jáne sport alańdary ornatylyp, asfalt tóseý jáne abattandyrý júrgiziledi. 5 jyl ishinde jóndeýdi qajet etetin barlyq aýlalardy retke keltirýdi josparlap otyrmyz», - dedi Ǵaýez Nurmuhambetov.

Buǵan deıin Petropavlda 3,2 mlrd teńgege ústel tennısi ortalyǵy salynyp jatqanyn aıtqan edik.