Petropavlda kópqabatty úılerdiń qabyrǵalaryn boıap jatyr
Bıyl shamamen 30 turǵyn úıdiń qasbetin boıaý josparlanǵan. Úsh kópqabatty úıdiń qabyrǵalaryn boıaý jumystary aıaqtaldy, endi tórteýin jańa túske boıap jatyr. Qalanyń turǵyn úı ınpektsııasynda málim etkendeı, atalmysh jumystarǵa bıýdjetten 50 mıllıon teńge bólingen.
Boıaý úshin aq, sur, qyzǵylt, qyzyl-qoshqyl sııaqty kózge túse qoımaıtyn túster tańdaldy. Plıtalardy arnaıy boıaý jaqqyshtarmen boıap jatyr. Bir úıdi boıap bitirý úshin shamamen 1 apta ýaqyt ketedi. Alaıda ara-tura jaýyp turatyn jańbyr men qatty jel jumystarǵa kedergisin keltirmeı qoımaıtyny anyq.
«Mıras Group» JShS-nyń merdigeri tabıǵı jaǵdaılar boıaý jumystarynyń sapasyn nasharlatpaıtynyn, 5 jylǵa deıin kepildik beriletinin aıtady.
Petropavldaǵy úılerdiń qasbetterin boıaý ótken jyly bastalǵan. Ol kezde kópqabatty úılerdiń 15-ne jańa reń berildi. Qaladaǵy eki úıdiń qabyrǵasyna úlken graffıtı sýret paıda bolǵan. Onda sýretshiler tanymal soltústikqazaqstandyq sportshy Aleksandr Vınokýrovty beınelegen. Bul is demeýshilik qarjy arqyly júzege asty. Jergilikti bıliktiń málimdeýinshe mundaı graffıtı-sýretter áli birneshe úıde paıda bolady.