Petropavlda kópqabatty úıler jylytý maýsymyna qanshalyqty daıyn
Petropavl qalasy ákimdiginiń turǵyn úı ınspektsııasy bóliminiń málimetinshe, Petropavlda ortalyqtandyrylǵan jylytý júıesine qosylǵan 1106 kópqabatty turǵyn úı bar.
Páter ıeleri kooperatıvteri men úıge jaýapty tulǵalar jaz ýaqytynda baspanalardy qysqa ázirleýge mindetti.
Tıisti jumys júrgizbegen soń qysta turǵyndar zardap shegedi.
«2020-2021 jylǵy jylytý maýsymynda 167 shaǵym tústi. Negizinen qysqa tıisti deńgeıde ázirlenbegen, ıaǵnı jylytý júıesin qysqa jýyp-tazalamaǵan jáne esh ruqsatsyz jylytý júıesine ózgeris engizgen úı turǵyndary aryzdanǵan. Olardyń páterleri salqyn bolǵan. Biz qazir jylý berýshi kásiporynmen birge bir-eki jyl boıy qysqy maýsymǵa daıyndyq jumystaryn júrgizbegen úılerdiń tizimin aldyq. Árqaısysyna baryp, úıge jaýapty tulǵalarmen, páter ıelerimen kezdesip, túsindirý jumystaryn júrgizip jatyrmyz», - deıdi bólim basshysy Aslan Іlııasov.
Mamannyń aıtýynsha, 1 shildeden bastap 500-ge tarta páter ıeleri kooperatıvine kúzgi-qysqy kezeńge aldyn ala daıyndalý týraly habarlama taratylǵan.
Qazirgi ýaqytta 165 kóp qabatty úı aldaǵy jylytý maýsymyna daıyn degen qujatqa ıe.
«Jaz tez-aq óte shyǵady. Sol sebepti atqarylar jumysty kúzge qaldyrmaı osy bastan ázirlikti bastaýǵa shaqyramyz. Petropavlda úıdi qysqa ázirleıtin, jylytý júıesin jýyp-tazalaıtyn 10 kompanııa bar. Olar týraly málimetti qalalyq ákimdiktiń resmı saıtynan tabýǵa bolady», - deıdi Aslan Іlııasov.