Petropavlda kópqabatty 10-ǵa jýyq úı salynyp bitkenimen, tapsyrylmaı tur
Soltústik Qazaqstan oblysy kásipkerler palatasy baspasóz qyzmetiniń málimetinshe, óńir basshysynyń orynbasary Sátjan Ablalıevtiń qatysýymen óńirdegi qurylys máselesi qozǵalǵan kezdesý ótti.
Sonyń biri – daıyn nysandardyń der kezinde tapsyrylmaýy. Saldarynan merdigerler olardy kútip ustaý boıynsha qosymsha shyǵynǵa batyp jatyr. Basty sebep - salynyp bitken ǵımarattarǵa basqa qurylys uıymdary ınjenerlik kommýnıkatsııalardy júrgizbegen.
«Men osydan eki jyl buryn qurylysy aıaqtalǵan úıdi paıdalanýǵa bere almaı otyrmyn. Olardyń biri – «Bereke» shaǵyn aýdanyndaǵy 100 páterli úı, ekinshisi Park kóshesindegi 144 páterli úı. Qazir aýa-raıy jaqsaryp keledi, men bul úılerge kosmetıkalyq jóndeý júrgizýge májbúrmin, ıaǵnı qystan keıin nysandardy qalpyna keltirýge qosymsha shyǵyn shyǵarýym kerek. Óıtkeni bul úılerge eshkim jelilerdi tartýǵa asyǵar emes» , - deıdi «Stroıkompanııa» JShS dırektory Haıdar Atajanov.
Dál osyndaı jaǵdaı «Osnovanıe» JShS-de, kópqabatty eki úı eki jyldyń ishinde jylý berilmegennen tozǵan. Qurylysshylar endi páterlerdegi jarylǵan lınoleým men isingen esikterdi aýystyrýǵa, qabyrǵalardy qaıta durystaýǵa májbúr. Jalpy Petropavlda mundaı kópqabatty úılerdiń sany búginde 10-ǵa jýyq.
SQO Kásipkerler palatasy ókilderiniń pikirinshe, tapsyrys berýshi - jergilikti atqarýshy organ máseleni sheshýi tıis. ıAǵnı úılerge kommýnıkatsııalar júrgizý tenderin jeńip alǵan, biraq barlyq sharttyq merzimdi buzǵan merdigerlerge qatysty túbegeıli shara qoldanylýy tıis. Sondaı-aq zardap shekken tarapqa – qurylys kompanııalaryna qosymsha shyǵyn úshin ótemaqy tóleýleri qajet.
Jıyn barysynda qurylys salasyna qatysty máselelerdi jedel sheshý úshin SQO Kásipkerler palatasynyń óńirlik keńesi janynan salalyq qurylys komıtetin qurý usynyldy.