Petropavlda kópqabatty 39 úıdiń 3 myńnan astam páteri gazsyz qaldy

<p>Petropavl turǵyndary kógildir otynnan qıyndyq kórip otyr. Oblys ortalyǵyn gazben qamtıtyn kásiporyn aıazǵa tózimdi suıyq otyn almaǵandyqtan, ol qaıta-qaıta qatyp qalýda, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Gorgaz-servıs» JShS málimetinshe, 12 jeltoqsan kúni 39 kópqabatty úıdiń 3063 páteri kógildir otynsyz qaldy. Oǵan sebep – aıazǵa beıimdelmegen suıyq otyn qatyp qalǵan.

«Standart boıynsha jaz ýaqytynda «tehnıkalyq propan-býtan qospasy» markasy qoldanylady. Qysta gazgolderlerge «tehnıkalyq propan» quıylýy tıis.

«Tehnıkalyq propandy» seriktestik jalǵyz jetkizýshi, sheteldik ınvestor «Tengızshevroıl» JShS-den kommertsııalyq baǵamen jabyq tenderde alýǵa májbúr. Elimizde gazdyń bul túri az bolǵandyqtan, onyń baǵasy jazǵy gazǵa qaraǵanda anaǵurlym joǵary. Tamyz aıynda SQO boıynsha tabıǵı monopolııalardy retteý departamenti «Gorgaz-servıske» suıytylǵan gazdyń turǵyndarǵa toptyq rezervýarlyq qondyrǵy arqyly beriletin baǵasyn arzandatty. Osylaısha Departament «Tehnıkalyq propannyń» qunyn «Tehnıkalyq propan-býtan qospasymen» teńestirip tastady. Saldarynan JShS 4 aıdan beri kommertsııalyq tenderde qystyq gazdy ala almaı otyr», - deıdi «Gorgaz-servıs» JShS ókilderi.

Seriktestik Departamentti SQO mamandandyrylǵan aýdanaralyq ákimshilik sotyna berip, jeńip shyqty. Biraq ýaqyt ótip ketip, olar qysqy gazdyń qoryn jasaı almaǵan.

«Aıaz bastalǵaly bizdiń qyzmet kúni-túni -30 gradýsta dalada jumys istep jatyr. Óıtkeni qysqa shaqtalmaǵan benzın qatyp qaldy. Qoldan kelgenniń bárin istep jatyrmyz. Jaqyn arada kezekpen, tehnıkalyq múmkindikke qaraı beremiz», - deıdi mamandar.