Petropavlda kópirden temirjolǵa sekirmek bolǵan áıel qutqaryldy
Soltústik Qazaqstan oblysy polıtsııa departamenti baspasóz qyzmetiniń málimetinshe, oqys oqıǵa 6 jeltoqsanda túnde bolǵan. Tártip saqshylary Jumysshy kentindegi kópirden ótip bara jatyp, kópir qorshaýynan sekirýge oqtalǵan áıeldi baıqap qalady. Áıeldi qutqarmaq bolǵan polıtseılerge kómekke ótip bara jatqan qala turǵyny kelgen. Olar kópirden temir jolǵa sekirip ólmek bolǵan áıeldi qutqaryp qaldy.
Ózine qol salmaq bolǵan Sh.Ýálıhanov aýdanynyń 33 jastaǵy týmasy eken. Ol sol kúni birneshe ret uryp-soqqan azamattyq nekedegi kúıeýine shaǵymdanyp, polıtsııaǵa aryz jazǵan. Kelinshektiń eki balasy bar, olardy aýdandaǵy týystarynyń úıine qaldyryp ketipti. Úıine barýǵa qoryqqan. Jumysshy kentinde turatyn qurbysynda qonbaq bolǵan, alaıda ol kirgizbeı qoıǵan. Barar jeri qalmaǵan kelinshek janynan bezip, kópirden sekirip ketpek bolypty.
«Áıelge psıhologııalyq kómek kórsetildi. Búginde ol turmystyq zorlyq-zombylyq kórgenderge arnalǵan baspanaǵa ornalastyryldy. Al sol túni ótip ketpeı, tártip saqshylaryna áıeldi qutqarýǵa kómektesken qala turǵynyna alǵys aıtamyz», - deıdi Petropavl qalalyq polıtsııa basqarmasy Ekinshi bólimniń bastyǵy Rýslan Syzdyqov.
Qazir áıeldiń kúıeýi, 36 jastaǵy Petropavl turǵynyna qatysty polıtseıler materıal jınap jatyr.
«Ýchaskelik polıtsııa ınspektory qorǵaý nusqamasyn berdi. Sot-medıtsına saraptamasy jasalady. Onyń qorytyndysy boıynsha áıeldi jábirlegen er adam jaýapkershilikke tartylady», - deıdi qalalyq Polıtsııa basqarmasy Birinshi bólimniń jergilikti polıtsııa qyzmetiniń bastyǵy Anarbek Baıǵutdınov.